ބުރަކޮށް މަސައްކަތްކުރާ މުވައްޒަފުންގެ މުސާރަ ކުޑަކުރަން ތާއީދު ނުކުރައްވާ ކަމަށް އައްޑޫ މީދޫ ދާއިރާގެ މެންބަރު އަބްދުއްރަހުމާން (އައްދު) ވިދާޅުވެއްޖެ އެވެ.
ހަރަދު ކުޑަކުރަން ކުރިއަށް އޮތް ދެ އަހަރު ދުވަހުގެ މުއްދަތަކަށް ގިނަ ފިޔަވަޅުތަކެއް އެޅުމަށް ނިންމާފައިވާކަން ރައީސް ޑރ. މުހައްމަދު މުއިއްޒު ދާދިމުފަހުން ވަނީ އިއުލާންކުރައްވާފަ އެވެ. އޭގެތެރޭގައި ސިޔާސީ މުވައްޒަފުންނާއި ދައުލަތުގެ ވެރިންގެ މުސާރައިން 10 ޕަސެންޓް އުނިކުރުން ހިމެނެ އެވެ. އަދި ކުންފުނިތަކުގެ ވެރީންނަށް އެންމެ ބޮޑުކޮށް ދެވޭނީ 90،000 ރުފިޔާ ކަމަށް ކަނޑައެޅުން ވެސް ހިމެނެ އެވެ.
ރައީސް ވަނީ މި ފިޔަވަޅުތައް އެޅުމުގައި 12،000 ރުފިޔާއިން ދަށުން މުސާރަ ލިބޭ ފަރާތްތައް އިސްތިސްނާ ވާނެ ކަމަށް ވިދާޅުވެފަ އެވެ.
މި ނިންމުމާ ގުޅިގެން އައްދު ވިދާޅުވީ މި ސަރުކާރުން މަޖިލިސް އިންތިހާބާއި ދިމާކޮށް ދިވެހި ދައުލަތް އެއްފަރާތަށް އަރިކޮށް ދިންހާ ބޭކާރު ވަޒީފާތަކާއި ސިޔާސީ މީހުންނަށް ދޭންޖެހޭ ފައިސާގެ ބުރައަކީ ބާކީ ތިބި 12،000ރ. ނޫން އެއަށް ވުރެ ގިނައިން ލިބޭ އާދައިގެ ބުރަ މަސައްކަތް ކުރާ ސަރުކާރުގެ މުވައްޒަފުން އަދި ތަފާތު ސްޓޫޑަންޓް ލޯންތަކުގައި ތިބި ދަރިވަރުން އެއްވެސް ވަރަކަށް އުފުލަން ޖެހޭނެ ބުރައެއް ކަމަށް ގަބޫލުނުކުރާ ކަމަށެވެ.
"މުސާރަ ނުނަގާނަމޭ ވިދާޅުވާ ބޭފުޅުންނަކީ ހައްގުން އަދި ނުހައްގުން މަހެއްގެ މައްޗަށް މިލިއަނުން ލިބޭ ބޭފުޅުން. އިށީންނާނެ ގޮނޑިއެއް މޭޒެއް ނެތް، ކުރާނެ މަސައްކަތެއް ނެތް އަދި ހަމަ އެކަނި ވައިބާ ގުރޫޕެއްގައި އައިއެމް ޕްރެޒެންޓް ޖަހާފައި މުސާރަ ނަގަމުންދާ ޕާޓީ މީހުންނަށް ޓަކާ ބާކީ ބެކްގްރައުންޑުގައި ހަގީގީ ބުރަމަސައްކަތް ކުރާ މަސައްކަތްތެރިންގެ މުސާރައިން އެއްމެ ލޯލާރިއެއް ވެސް މަދު ކުރަން އަޅުގަނޑު ތާއިދެއް ނޫން." އައްދު ވިދާޅުވި އެވެ.
އައްދު ވަނީ ގައުމަށް އިހުލާސްތެރި ކަމެއް ހުރިނަމަ އިންތިހާބާއި ދިމާކޮށް ވަޒީފާތަކަށް ނެގި ބޭކާރު އެންމެން ވަކި ކުރުމަށް ސަރުކާރަށް ގޮވާލާފަ އެވެ. އަދި މަޖިލީހުގެ ޖަލްސާ އަދި ކޮމެޓީތަކުގައި ވާޗުއަލްކޮށް ދާއިރާގައި ތިބެގެން ބައިވެރިވެވޭ ގޮތް ހަދައި ދީފިނަމަ މަޖިލިސް މުސާރައިގެ 50 ޕަސެންޓަށް ތާއަބަދަށް އުނިކުރަންވެސް ތާއީދުކުރައްވާނެ ކަމަށް އައްދު ވިދާޅުވި އެވެ.