ރާއްޖޭގެ ހައި ކޯޓްގެ އެވޯޑެއް މިހާރގެ ރައީސް ޑރ. މުހައްމަދު މުއިއްޒުގެ ބައްޕާފުޅު މަރުހޫމް ޝައިހް ހުސެއިން އަބްދުއްރައްމާނަށް އަރުވާ ގޮތަށް ނިންމައިފި އެވެ.
އެ އެވޯޑް އަރުވާނީ އެ ކޯޓްގެ 44 ވަނަ އަހަރީ ދުވަސް ފާހަގަކުރަން މިރޭ ބާއްވާ ރަސްމިއްޔާތުއްގަ އެވެ. އަބްދުއްރަހުމާނަށް އަރުވާ އެވޯޑާ ހަވާލުވާނި އާއިލާގެ ފަރާތުންނެވެ. ޝަރުއީ ދާއިރާ އަށް ކޮށް ދެއްވާފައިވާ ހިދުމަތްތަކުގެ އަގުވަޒަން ކުރައްވައި މަރުހޫމް އަބުދުއްރަހުމާނަށް އަރުވާ އެވޯޑާ އެކީ ގައުނެއް ވެސް އަރުވާނެ އެވެ.
ރ. ވަށަފަރަށް އުފަންވެވަޑައިގެން އަބްދުއްރަހުމނަކީ ފަނޑިޔާރެއްގެ ގޮތުގައި ހިދުމަތް ކުރެއްވި ދީނީ އިލްމުވެރިއެކެވެ. ކުރީގެ ރައީސް ރައީސް މުހައްމަދު ވަހީދު ހަސަން މަނިކުގެ ވެރިކަމުގައި ވަނީ ދީނީ ހޭލުންތެރިކަން އިތުރު ކުރެއްވުމަށާއި ދީނީ ތައުލީމަށް ކުރެއްވި ހިދުމަތުގެ އަގު ވަޒަން ކުރައްވައި އަބްދުއްރަހުމާނަށް ގައުމީ އިނާމު ވެސް ދީފަ އެވެ.
އަބްދުއްރައްމާނަކީ އަވަހާރަވުމުގެ ކުރިން "ދިމްޔާތު ގެސްޓްހައުސް" ގެ ވެރިޔާ ވެސް މެ އެވެ.
މިރޭ ހައި ކޯޓުން ބާއްވާ އަހަރީ ހަފުލާގައި އެ ކޯޓުގައި ހިދުމަތް ކުރެއްވި ފަނޑިޔާރުންނަށް ވެސް އެވޯޑު އަރުވާނެ އެވެ. އަދި ހަފުލާގައި ހައި ކޯޓުގެ އިސްތިރާޖީ އަމަލީ ތަދުބީރު ލޯންޗު ކުރުމުގެ އިތުރުން، ދައުލަތަށް ހިދުމަތް ކުރުމުގައި ގައިމީ އިނާމު ލިބިފައިވާ މުވައްޒަފުންނަށް ހަނދާނީ ލިޔުން ދިނުން ވެސް ދޭނެ އެވެ.