އިޒްރޭލުން ވައިގެ މަގުން އީރާނުގެ ވެރިރަށް ތެހެރާން ހިމެނޭހެން އެ ގައުމުގެ ސަރަހައްދުތަކަށް ދިން ހަމަލާ ރާއްޖެއިން ކުށްވެރިކޮށްފި އެވެ.
ފޮރިން މިނިސްޓްރީން ނެރުނު ބަޔާނެއްގައި ބުނީ އިޒްރޭލުން އިރާނަށް ދިން ހަމަލާ ކުށްވެރިކުރާ ކަމަށާއި މިއީ ބައިނަލްއަގްވާމީ ގާނޫނުތަކާއި އުސޫލުތަކާ ހިލާފަށް ދިން ހަމަލާއެއް ކަމަށެވެ.
ސަރަޙައްދުގެ ހަމަޖެހުމާއި އިސްތިގުލާލަށް ނުރައްކާވާ ފަދަ ގޮތަކަށް ހިނގަމުންދާ އަމަލުތައް ހުއްޓާލުމަށާއި ހުރިހާ ފަރާތްތަކަކުން ވެސް ބައިނަލްއަގުވާމީ ގާނޫނުތަކަށް އިހުތިރާމް ކުރުމަށް ވެސް ވަނީ ގޮވާލާފަ އެވެ.
އިޒްރޭލުން ދިން ހަމަލާތަކުގައި އިރާނުގެ ސިފައިންގެ ދެ މީހަކު ވަނީ މަރުވެފަ އެވެ. މިއީ މި މަހުގެ ކުރީކޮޅު އިރާނުން އިޒްރޭލަށް ދިން ހަމަލާގެ ރައްދުގައި ދިން ހަމަލާއެއް ކަމަށް އިޒްރޭލުން ބުނެ އެވެ.
މި މަހުގެ ކުރީކޮޅު އިރާނުން ވަނީ އިޒްރޭލުގެ މެދުތެރޭގެ ހިސާބުތަކަށް އަމާޒުކޮށް 200 އަށް ވުރެ ގިނަ ވައިގެ ހަމަލާ ފޮނުވާލާފަ އެވެ. މިއީ ހަމާސް ޖަމާއަތުގެ ވެރިޔާ އިސްމާއިލް ހަނިއްޔާ އާއި ލުބްނާނުގެ ހިޒްބުﷲ ޖަމާއަތުގެ ލީޑަރު ހަސަން ނަސްރުﷲ އަވަހާރަކޮށްލުމުގެ ބަދަލެއްގެ ގޮތުން ދިން ހަމަލާއެއް ކަމަށް އިރާނުން ވަނީ ބުނެފަ އެވެ.
އިރާނުން ވަނީ މި ހަމަލާގެ ރައްދުގައި އިޒްރޭލުން ހަމަލާއެއް ދީފިނަމަ އެގައުމަށް އެކަށީގެންވާ ވަރުގެ ރަނގަޅު ރައްދެއް ދޭނެ ކަމަށާއި އެކަމަށް އިރާނު އޮތީ ފުރިހަމަ އަށް ތައްޔާރަށް ކަމަށް މީގެކުރިން ބުނެފަ އެވެ.
އިޒްރޭލުން އިރާނަށް ހަމަލާ ދީފައިވާއިރު އެގައުމުން އަންނަނީ ހުއްޓުމެއް ނެތި ލުބްނާނުގެ އެކި ސަރަހައްދުތަކަށް ވެސް ވައިގެ ވަރުގަދަ ހަމަލާތަކެއް ދެމުންނެވެ. އެ ހަމަލާތަކުގައި ލުބްނާނުން މިހާތަނަށް 1،000 އަށް ވުރެ ގިނަ މީހުން މަރުވެފައިވާއިރު، ލުބްނާނުން 100،000 އަށް ވުރެ ގިނަ މީހުން ވަނީ އެގައުމު ދޫކޮށް ސީރިޔާ އަށް ގޮސްފަ އެވެ.
މީގެއިތުރުން އިޒްރޭލުން އަންނަނީ ފަލަސްތީނުގެ ގާޒާގައި ވެސް ބޮޑު ގަތުލްއާންމެއް ހިންގަމުންނެވެ. އެ ގަތުލްއާންމުގައި މިހާތަނަށް ގާޒާ އިން ވަނީ 42،000 އަށް ވުރެ ގިނަ މީހުން މަރުވެފަ އެވެ.