ބޮލީވުޑްގެ ތަރި އަޖޭ ދޭވްގަން މީގެ 20 އަހަރު ކުރިން ކުޅުނު ފިލްމެއް ރިލީޒް ނުކުރެވި ދިގުލައިގެން ގޮސްފައި ވަނިކޮށް އެ ފިލްމު އަންނަ މަހު ރިލީޒްކުރަން ނިންމައި ފިލްމުގެ ޕޯސްޓަރެއް ވެސް މިއަދު އާންމުކޮށްފި އެވެ.
އަންނަ މަހުގެ 22 އަށް ތާވަލުކުރި ފިލްމުގެ ނަމަކީ "ނާމް" އެވެ. މީގެ ޑައިރެކްޓަރަކީ އަންނަ މަހުގެ 1 ގައި ރިލީޒްކުރަން ހަމަޖެހިފައިވާ ކާތިކް އާރިއަންގެ ހޮރޯ-ކޮމެޑީ "ބޫލް ބުލައްޔާ 3" ގެ ޑައިރެކްޓަރު އަނީސް ބަޒްމީ އެވެ. އެ ފިލްމާ އެއް ދުވަހެއްގައި އަޖޭގެ "ސިންގަމް އެގެއިން" ވެސް ރިލީޒްކުރަން އޮތީ ނިންމައިފަ އެވެ.
މިއީ ޑައިރެކްޓަރު ރޯހިތު ޝެޓީގެ ކޮޕް ޔުނިވާސްގައި ހިމެނޭ އަޖޭގެ "ސިންގަމް" ފްރެންޗައިޒް" ގެ ތިން ވަނަ ބައެވެ.
އަޖޭއާ އެކު "ނާމް" ގައި ބަތަލާގެ ރޯލު ކުޅެފައި ވަނީ މިހާރު ފިލްމު ކުޅުން ހުއްޓާލާފައިވާ ކުރީގެ ބަތަލާ ސަމީރާ ރެޑީ އެވެ.
ދެހާސް ހަތަރެއްގައި ޝޫޓްކުރި ފިލްމު 20 އަހަރު ފަހުން ރިލީޒްކުރާ އިރު، "ނާމް" ގެ ޑައިރެކްޓަރު ބަޒްމީއާ އަކީ އަޖޭ ވަރަށް ކާމިޔާބު އިތުރު ދެ ފިލްމެއްގެ މަސައްކަތް ވެސްކޮށްފައިވެ އެވެ. އެއީ 1999 ގެ "ޕިޔާރު ތޯ ހޯނާ ހީތާ" އާއި 2002 ގެ "ދީވާންގީ" އެވެ.
"ނާމް" އަންނަ މަހު ސިނަމާތަކަށް ގެންނަން ނިންމި އިރު، މި ފިލްމު 2013 ގައި ވެސް ރިލީޒްކުރުމުގެ ވާހަކަތަކެއް ދެކެވިފައިވެ އެވެ.