ޖޫނިއާ ސާފިން: ތަރިންނަކީ އިނާން، ކަޔާން އަދި ޔަސީން

މޯލްޑިވްސް ސާފިން އެސޯސިއޭޝަން (އެމްއެސްއޭ) އިން ބޭއްވި ގައުމީ ޖޫނިއަ ސާފިން ޗެމްޕިއަންޝިޕް އިއްޔެ ނިންމާލައިފި އެވެ.

މާލޭގެ ވަރުނުލާ ރާޅުގަނޑު ސަރަހައްދުގައި މި މުބާރާތް ބޭއްވީ ތިން އުމުރުފުރައަކަށް ހާއްސަކޮށްގެންނެވެ. އެއީ 14 އަހަރުން ދަށް، 16 އަހަރުން ދަށް އަދި 18 އަހަރުން ދަށެވެ.

އެގޮތުން 18 އަހަރުން ދަށުގެ ޗެމްޕިއަންކަން މުޙައްމަދު އިނާން އަބްދުލް ހަންނާން ހޯދީ ފައިނަލުގައި ޔޫސުފް ކަޔާން ހަމްދާން ޒަނީ ބަލިކޮށެވެ. އެ ހީޓުގައި އިނާން 10.17 ސްކޯ ކުރިއިރު، ކަޔާނަށް ލިބިފައިވަނީ 7.50 ގެ ސްކޯއެކެވެ.

މި މުބާރާތުގެ 16 އަހަރުން ދަށުގެ ޗެމްޕިއަންކަން ކަޔާން އަބްދުﷲ އަރީފް ހޯދީ 11.33 ގެ ސްކޯއަކާ އެކީގަ އެވެ. އޭނައާ ވާދަކުރި ޔަސީން އަޙްމަދު ނާޝިދަށް ލިބިުނީ 7.24 ގެ ސްކޯއެކެވެ.

މި މުބާރާތުގެ 16 އަހަރުން ދަށުގެ ފައިނަލުން ޔަސީން ބަލިވި ނަމަވެސް، އޭނާ ވަނީ 14 އަހަރުން ދަށުގެ ޗެމްޕިއަންކަން ހޯދައިފަ އެވެ. އެގޮތުން ފައިނަލުގައި ޔަސީން 9.83 ގެ ސްކޯއެއް ހޯދި އިރު، އޭނާއާ އެންމެ ގާތުން ވާދަކުރި ނޫހު މުޙައްމަދު ދުނައިމް އިރުޝާދަށް ލިބުނީ 6.57 ގެ ސްކޯއެކެވެ.

މި މުބާރާތުގެ 14 އަހަރުން ދަށުގެ ޓްރޮފީ ޔަސީން ދިފާއުކުރި އިރު، މިދިޔަ އަހަރު އޭނާ ވަނީ 14 އަހަރާއި 16 އަހަރުން ދަށުގެ އުމުރުފުރާގެ ޗެމްޕިއަންކަންވެސް ހޯދައިފަ އެވެ.