ސޮނީ ޓީވީގެ "ސީއައިޑީ" ގެ ދެވަނަ ސީޒަނެއް ގެނެސްދޭން ނިންމިކަން އިއުލާންކުރުމަށް ފަހު، އޭގެ ޕްރޮމޯ ވެސް ދައްކާލައިފި އެވެ.
މީގައި ފެންނަނީ މި ޝޯގެ މައިގަނޑު ތިން ތަރިންގެ ތެރެއިން ދަޔަނަންދު ޝެޓީގެ ގަޔަށް އަދިތިޔާ ސްރިވަސްތާވް ބަޑި ޖެހުމުން އުސް ފަރުބައެއްގެ މަތިން އޭނަ ވެއްޓިގެން ދާ ތަނެވެ. އެ ދެ މީހުންނާ އެކީ "ސީއައިޑީ" ގެ ދެން އެންމެ މުހިއްމު ތަރިއަކީ ދުވަސްވީ އެކްޓަރު ޝިވާޖީ ސަތަމް އެވެ.
ސޮނީގެ މި ޝޯ އަކީ އާންމުންގެ ވަރަށް ބޮޑު މަގުބޫލު ހޯދި އަދި ވަރަށް ގިނަ ދުވަސްތަކެއް ވަންދެން ގެނެސްދިން ޝޯއެކެވެ. "ސީއައިޑީ" ގެ ދެވަނަ ސީޒަނެއް ގެނެސްދޭން މި ނިންމީ 2018 ގައި ހުއްޓާލުމަށް ފަހު އެވެ.
ޖެނުއަރީ 21، 1998 އިން އޮކްޓޯބަރު 27، 2018 އެ ޝޯ ގެނެސްދިން އިރު، އެ މުއްދަތުގެ ތެރޭގައި ޖުމްލަ 1،547 އެޕިސޯޑް ގެނެސްދީފައިވެ އެވެ.
"ސީއައިޑީ" ގެ ދެވަނަ ސީޒަންގެ ޕްރޮމޯ ދައްކައިލި ނަމަވެސް ޝޯ ބެލުންތެރިންނަށް ގެނެސްދޭން ފަށާނެ ތާރީހެއް އަދި އިއުލާނެއް ނުކުރެ އެވެ. މީޑިއާތަކުން ބުނީ މީގެ ޝޫޓިން އަންނަ މަހުގެ ތެރޭގައި ފަށާނެ ކަމަށެވެ.