އެމެރިކާގެ އެންމެ ދުވަސްވީ މީހާގެ ރެކޯޑް އޮތް އެލިޒަބަތު ފްރާންސެސް އުމުރުން 115 އަހަރުގައި މިދިޔަ އަންގާރަ ދުވަހު މަރުވެއްޖެ އެވެ.
"ކްއީން އެލިޒަބަތު އޮފް ހިއުސްޓަން" ގެ ގޮތުގައި ސިފަކުރަަމުން އައި ފްރާންސިސް އަކީ 110 އަހަރު ފަހަނަޅައި ދިޔަ އެމެރިކާގެ މަދު މީހުންގެ ތެރެއިން އެކެކެވެ. އެގޮތުން އޭނަ އަކީ އެމެރިކާގެ ތާރީހުގައި 21 ވަނަ އަށް އެންމެ ދުވަސްވީ މީހާ އެވެ. ފްރާންސިސް މަރުވި އިރު އުމުރަކީ 115 އަހަރާއި 94 ދުވަހެވެ.
ފްރާންސިސްގެ އާއިލާ އިން ބުނީ އޭނަގެ މަރާ ގުޅިގެން އެމެރިކާގެ ވަރަށް ގިނަ އަދަދެއްގެ ސިޔާސީ ބޭފުޅުންނާއި ނުފޫޒު ގަދަ އެތައް ބަޔަކު އާއިލާ އަށް ޒިޔާރަތްކޮށް ތައުޒިޔާ ކިޔާފައިވާ ކަމަށެވެ.
ފްރާންސިސް އުފަންވީ ޖުލައި 25، 1909 ގައި ލޫސިއާނާއަށެވެ. އޭނަގެ ދިގު އުމުރުގައި އެމެރިކާގެ 20 ރައީސަކު ފެނިފައިވެ އެވެ. އަދި ފްރާންސިސް އަކީ ދުނިޔޭގައި ހިނގި އެންމެ ވަރުގަދަ ދެ ހަނގުރާމަ ކަމަށްވާ ފުރަތަމަ ބޮޑު ހަނގުރާމަ އާއި ދެވަނަ ބޮޑު ހަނަގުރާމައިގެ ތަޖުރިބާތަކެއް ވެސް ކޮށްފައިވާ މީހެކެވެ.
ފްރާންސިސް އަށް ލިބިފައި ވަނީ އެންމެ ކުއްޖެކެވެ. އެއީ 1928 ގައި އުފަންވި ޑޮރޯތީ ވިލިއަމްސް އެވެ. ހަޔާތުގެ ބޮޑުބައި ފްރާންސިސް ހޭދަކުރީ އެކަނިވެރި މައެއްގެ ގޮތުގަ އެވެ. އޭނަ މަރުވި އިރު ތިން މާމަދަރިންނާއި ހަތަރު މުނިމާމަ ދަރިންގެ އިތުރުން ދެ މުނިމުނި މާމަދަރިން ދުނިޔޭގައި އެބަތިއްބެވެ.