ޕްރޮސެކިއުޓާ ޖެނެރަލް (ޕީޖީ) ގެ މަގާމުގައި ހުސައިިން ޝަމީމު ހުންނެވި އިރު އެ އޮފީހާ ކޮށްފައިވާ ދައުވާތަކާ ގުޅޭ ގޮތުން، ޝަކުވާ ހުށަހެޅުމަށް ހުޅުވާލި މުއްދަތުގައި 500 އަށް ވުރެ ގިނަ ޝަކުވާ ހުށަހަޅައިފި އެވެ.
ޝަކުވާ ހުށަހަޅަން އާ ޕީޖީ އައްބާސް ޝަރީފް ފުރުސަތު ހުޅުވައިލީ މި މަހުގެ 1 ގަ އެވެ. އެގޮތުން އެކަމަށް ދިން 20 ދުވަހުގެ މުއްދަތަށް މި މަހުގެ 20 އަށް ވަނީ ހަމަވެފަ އެވެ.
ޕީޖީ އޮފީހުން ބުނިގޮތުގައި ޝަކުވާތަކަށް ހުޅުވައިލުމުން މުރާޖަޢާ ކުރުމަށް ކޮމިޓީއަށް ލިބިފައި ވަނީ ޖުމްލަ 539 ޝަކުވާ އެވެ. ކަމަށާއި މި ޝަކުވާތައް މިހާރު ދަނީ މުރާޖަޢާކުރަމުންނެވެ.
އެ މައްސަލަތައް މުރާޖަޢާ ކުރުމުގެ ކަންކަން ކޮމިޓީއަކުން މިހާރު ކުރިއަށް ގެންދާ އިރު، އެ ކޮމިޓީގެ މައިގަނޑު މަސައްކަތަކީ މިހާރު ކޯޓަށް ހުށަހެޅިފައިވާ ދަޢުވާތަކާއި، ޖިނާއީ ކުށްތަކާ ގުޅިގެން ހައްޔަރުކޮށް ނުވަތަ ބަންދުކޮށްފައި ތިބި މީހުންގެ ބަންދު މުރާޖައާކުރުމަށް އެދި ހުށަހަޅާ ހުށަހެޅުންތަކާމެދު ޤާނޫނުއަސާސީއާއި ޤާނޫނާއި ކަމާ ގުޅުންހުރި ގަވާއިދުތަކުގެ އިމުގެ ތެރެއިން ގޮތެއް ނިންމައި، އެކަންކަމުގައި ޢަމަލުކުރަންވީ ގޮތުގެ ލަފާ ޕީޖީ އަށް އެރުވުމެވެ.
ޕީޖީ ނިންމާފައި ވަނީ އެއްވެސް މައްސަލައެއްގައި ކުރިން ޕީޖީ އޮފީހުން ނިންމާފައި އޮތް ނިންމުމެއް ބަދަލުކުރާ ނަމަ، އެކަން ކުރަން ޖެހުނު ސަބަބު ރައްޔިތުންނަށް ސާފު ވެސް ކޮށް ދެއްވުމަށެވެ. އަދި ނިންމުމެއް ބަދަލުނުކުރާ ނަމަ، ޝަކުވާ ހުށަހެޅުއްވި ފަރާތަށް އެކަން އަންގާނެ އެވެ.
އާ ޕީޖީ ވިދާޅުވެފައި ވަނީ އެއްވެސް މައްސަލައެއް އަމިއްލަ އިސްނެންގެވުމަށް ނުބައްލަވާނެ ކަމަށެވެ.