ކުރީގެ ރައީސް މުހައްމަދު ނަޝީދު އަވަހާރަކޮށްލުމަށް ދިން ބޮމުގެ ހަމަލާއާ ގުޅިގެން ދައުވާ އުފުލި މީހުންގެ ބައެއް ވަކީލުން ހާޒިރުނުވެގެން ޝަރީއަތް ކެންސަލް ކުރަންޖެހޭތީ އެކަމުގެ ކަންބޮޑުވުން މައްސަލަ ބައްލަވާ ގާޒީ ސޮފްއަތު ހަބީބް ފާޅުކުރައްވައިފި އެވެ.
މޭ 6 ގެ ބޮމުގެ ހަމަލާއާ ގުޅިގެން ދައުލަތުން ދައުވާ އުފުލާފައިވާ މީހުންގެ ޝަރީއަތް މިއަދު ކްރިމިނަލް ކޯޓުގައި ތާވަލުކުރިއިރު މިއަދު އޮތީ ދައުލަތުން ހުށަހަޅާފައިވާ ހެކިންގެ ހެކިބަސް ނެގުމެވެ.
މިއަދުގެ ޝަރީއަތް ފެށުމުން މައްސަލަ ބައްލަވާ ގާޒީ ވިދާޅުވީ ދައުވާ ލިބޭ އަލީ ހައިޝަމްގެ ވަކީލް ބަލިވެ އުޅޭ ކަމަށްބުނެ އަޑުއެހުމަށް ހާޒިރުވެވެން ނެތްކަން އަންގާފައިވާ ކަމަށެވެ. ނަމަވެސް އެ ސަބަބުތައް ބަލައިގަނެވެން ނެތްކަމަށާއި މީގެކުރިންވެސް މައްސަލައިގައި ހިމެނޭ ވަކީލަކު ބަލިވެ އުޅޭކަމަށް ބުނުމުން އަޑުއެހުންތައް މަޑުޖެހިފައި އޮތްކަން ގާޒީ ފާހަގަ ކުރެއްވިއެވެ.
ގާޒީ މިގޮތަށް ވިދާޅުވުމުން އަލީ ހައިޝަމް ބުނެފައިވަނީ އޭނާ މައްސަލައިގައި ކުރިއަށްދާން ބޭނުންވަނީ ވަކީލާއި އެކު ކަމަށެވެ. އަދި ދައުލަތުގެ ވަކީލްވެސް ވަނީ ހެކިބަސް ނެގުން ކުރިއަށް ގެންދިއުމަށް ހަމަޖެހިފައި އޮތުމުން ވަކީލާ ނުލައި ކުރިއަށް ގެންދަން އިއުތިރާޒު ކޮށްފަ އެވެ.
އެހެންކަމުން މައްސަލަ ބައްލަވާ ގާޒީ ވަނީ މިއަދުގެ އަޑުއެހުން ކެންސަލް ކޮށްފަ އެވެ. އަދި މި މައްސަލައިގެ އަޑުއެހުމެއް މާދަމާވެސް ކުރިއަށް ގެންދަވާނެކަން ހާމަކުރެެއްވި އެވެެ. އަދި ވަކީލުންގެ ފަރާތުން މައްސަލަ ކުރިއަށް ގެންދިއުމަށް އެއްބާރުލުން ދެއްވުމަށް އެދިވަޑައިގަތެވެ.
މޭ 6 ބޮމުގެ ހަމަލާއާ ގުޅިގެން ދައުވާ އުފުލާފައިވަނީ މުޖާޒް އަހުމަދު، ތަހުމީން އަހުމަދު، އަލީ ހައިޝަމް، ފަހުމީ އަލީ، އިސްހާގް އަދި މުހައްމަދު ނާޒިމްގެ މައްޗަށެވެ.