އަންނަ އަހަރަށް ސަރުކާރުން ލަފާކުރާ ދައުލަތުގެ ބަޖެޓު ރައްޔިތުންގެ މަޖިލީހަށް، އަންނަ ބުރާސްފަތި ދުވަހު ހުށަހަޅަން ނިންމާފައިވާ ކަމަށް މަޖިލީހުގެ ނައިބު ރައީސް އަހުމަދު ނާޒިމް ވިދާޅުވެއްޖެ އެވެ.
ނާޒިމް މިކަން ހާމަކުރެއްވީ މާލިއްޔަތު ކޮމިޓީ އާއި އިގުތިސޯދީ ކޮމިޓީގެ ޖޮއިންޓް ކޮމިޓީގެ މިއަދުގެ ބައްދަލުވުމުގައި ވާހަކަދައްކަވަމުންނެވެ.
ނާޒިމް ވިދާޅުވީ ބުރާސްފަތި ދުވަހު މަޖިލީހަށް ބަޖެޓް ހުށަހެޅުމުގެ ކުރިން ޓެކްސް ބޮޑުކޮށްގެން އާމްދަނީ ލިބޭ މިންވަރު ކަނޑައަޅަންޖެހޭ ކަމަށެވެ. އެ މިންވަރު ބަޖެޓްގައި ހިމަނަންޖެހޭ ކަމަށާއި އެހެންކަމުން މަޖިލީހަށް ބަޖެޓް ހުށަހެޅުމުގެ ކުރިން ޓެކްސް ބިލްތައް ނިންމަންޖެހޭ ކަމަށް ނާޒިމް ވިދާޅުވި އެވެ.
ޓެކްސާއާ ގުޅުންހުރި ހަތަރު ބިލެއް ކޮމެޓީ މަރުހަލާގައި އަންނަނީ ދިރާސާ ކުރަމުންނެވެ.
ގާނޫނު އަސާސީ ބުނާގޮތުން ކުރިއަށް އޮންނަ އަހަރަށް ލަފާކުރާ ދައުލަތުގެ ބަޖެޓު، ހިނގަމުންދާ އަހަރުގެ އޮކްޓޯބަރު މަސް ނިމުމުގެ ކުރިން މަޖިލީހަށް ހުށަހަޅަން ޖެހެ އެވެ.
މަޖިލީހުން މިއަހަރަށް ލަފާކޮށް ފާސްކުރީ 49.8 ބިލިއަން ރުފިޔާގެ ބަޖެޓެކެވެ.