ބޮލީވުޑްގެ ތަރި ސަލްމާން ޚާން ސިލްސިލާކޮށް "ދަ-ބަންގް" ނަމުގައި ބާއްވަމުން އަންނަ ޓުއާގެ ތެރެއިން ދުބާއީގައި އަންނަ ޑިސެމްބަރު މަހު ޝޯއެއް ބާއްވަން ނިންމައި އެކަން މިއަދު އިއުލާންކޮށްފި އެވެ.
އެ ޝޯ ތާވަލުކޮށްފައި ވަނީ ޑިސެމްބަރު 7 އަށެވެ.
ދުބާއީގައި ބާއްވާ "ދަ-ބަންގް: ދަ ޓުއާ ރީލޯޑެޑް ޓުއާ" ގައި މި ޓުއާގައި ކުރިން ފެށިގެން ވެސް ހިއްސާވަމުން އަންނަ ބައެއް ތަރިން ބައިވެރިވާނެ އެވެ. އޭގެ ތެރޭގައި ބަތަލާއިން ކަމަށްވާ ސޮނާކްޝީ ސިންހާ އާއި ޖެކްލީން ފެނާންޑޭޒް އާއި ޑިޝާ ޕަޓާނީގެ އިތުރުން މަޝްހޫރު ނެށުންތެރިޔާ/އެކްޓަރު ޕްރަބޫދޫވާ އާއި ލަވަކިޔުންތެރިޔާ އާސްތާ ގިލްގެ އިތުރުން ކޮމީޑިއަން/އެކްޓަރު ސުނިލް ގްރޯވާގެ އިތުރުން ހޯސްޓް/އެކްޓަރު މަނީޝް ޕޯލް ހިމެނެ އެވެ.
"ދަ-ބަންގް" ޓުއާ މިހާތަނަށް އެމެރިކާ އާއި ޔޫރަޕްގެ ވަރަށް ގިނަ ގައުމުތަކުގެ އިތުރުން އޭޝިއާ އާއި އެފްރިކާ ބައްރުގެ ބައެއް ގައުމުތަކުގައި ބާއްވާފައިވެ އެވެ. އަދި ޓުއާ އަށް އަބަދު ވެސް ބޮޑު ތަރުހީބެއް ލިބެ އެވެ.