ބޮލީވުޑްގެ އެކްޓަރު ސަންޖޭ ކަޕޫރްގެ ދަރިފުޅު، ޝަނާޔާ ކަޕޫރް ބޮލީވުޑަށް ތައާރަކުރަން ހަމަޖެހިފައިވާ ފިލްމު "އާނކޯ ކީ ގުސްތާކިޔާ" ގެ ޝޫޓިން މިއަދު ފަށައިފި އެވެ.
މިކަން ހިއްސާކޮށް 24 އަހަރުގެ ބަތަލާ ވަނީ އިންސްޓަގްރާމްގައި ފޮޓޯތަކެއް ވެސް ޕޯސްޓްކޮށްފަ އެވެ.
"އާނކޯ ކީ ގުސްތާކިޔާ" އަކީ "ބްރޯކެންޑް ބަޓް ބިއުޓިފުލް" އާއި "އަޕަހާރަން" ގެނެސްދިން ސަންތޯޝް ސިންގް ޑައިރެކްޓްކުރާ ؛ލޯބީގެ ފިލްމެކެވެ. މީގެ ބަަތަލަކީ ހުނަރުވެރި އެކްޓަރު ވިކްރާންތު މަސީ އެވެ. ޕްރޮޑިއުސަރުން ކަމަށްވާ މާންސީ ބަގްލާ އާއި ވަރޫން ބަގްލާގެ ފިލްމު ކުންފުނި، މިނީ ފިލްމްސް ހަދާ "އާނކޯ ކީ ގުސްތާކިޔާ" ކިޔައި ދޭނީ ލޯފަން މިއުޒިޝަނަކާއި ސްޓޭޖް ތަމްސީލުތައް ކުޅޭ ބަތަލާއަކާ ދެމެދު އުފެދޭ ގުޅުމެއްގެ ވާހަކަ އެވެ.
މި ފިލްމުގެ މަންޒަރުތައް އިންޑިއާގެ އިތުރުން ޔޫރަޕްގައ ވެސް ނަގާނެ އެވެ. އަދި ފިލްމު ސިނަމާތަކަށް ގެންނާނީ އަންނަ އަހަރުގެ މެދުތެރޭގަ އެވެ.
ޝަނާޔާ ބޮލީވުޑަށް ނެރޭ ފިލްމުގެ މަސައްކަތް މިއަދު ފެށި އިރު، އޭނަ ބޮލީވުޑަށް ނެރެން އިއުލާންކުރި ފުރަތަމަ ފިލްމަކީ ކަރަން ޖޯހަރްގެ ދަރުމާ ޕްރޮޑަކްޝަނުން 2022 ގައި އިއުލާންކުރި "ބޭދަޅަކް" އެވެ. އޭގެ ބަތަލުންނަށް ނެގީ ދާދި ފަހުން ރިލީޒްކުރި ދަރުމާގެ "ކިލް" އިން ތައާރަފުކުރި ލަކްޝް ލަލްވާނީ މި ފަހުން ސަޕޯޓިން ރޯލުތަން ފެންނަ ގުރްފަތޭ ޕިރްޒާދާ އެވެ.
"ބޭދަޅަކް" އަކީ "ދަޅަކް" އާއި "ހަމްޓީ ޝަރުމާ ކީ ދުލްހަނިއާ" އާއި "ބަދުރީނާތު ކީ ދލްހަނިޔާ" ގެ ޑައިރެކްޓަރު ޝިޝާންކް ކައިތާން ލިޔެ، ޑައިރެކްޓްކުރަން އިއުލާން ކުރި ފިލްމެކެވެ. އެކަމަކު ފިލްމުގެ ޕޯސްޓަރުތަކެއް ދައްކާލައި، ފިލްމު އިއުލާންކުރި ނަމަވެސް، ފަހުން އޭގެ މަސައްކަތް ވަނީ ހުއްޓާލައިފަ އެވެެ.
ނަމަވެސް ކޮން ސަބަބަކާ ހުރެ ކަމެއް ދަރުމާ އިން ނުބުނެ އެވެ. އަދި "ބޭދަޅަކް" ގެ އެއްވެސް ވާހަކައެއް ވެސް އެ ސްޓޫޑިއޯ އިން ފަހަކުން ނުދައްކަ އެެވެ.
މިދިޔަ އަހަރު ޝަނާޔާ ވަނީ މަަޝްހޫރު މަލަޔާމް އެކްޓަރު މޯހަލާލުގެ ފލްމަމަށް ސޮއިކޮށް، އޭގެ މަސައްކަތް ވެސް ނިންމައިފަ އެވެ. އެއީ "ރުޝާބާ" ކިޔާ ފިލްމެކެވެ.
ބައެއް އިޝްތިހާރުތަކުން ފެނިފައިވާ އަދި އިންސްޓަގްރާމްގައި ވެސް މަޝްހޫރު ޝަނާޔާ އަކީ ފިލްމީ ތަރިން ކަމަށްވާ ސޯނަމް ކަޕޫރާއި އަރުޖުން ކަޕޫރާއި ޖާންވީ ޖަޕޫރްގެ އިތުރުން ހުޝީ ކަޕޫރްގެ ކަޒިންއެކެވެ. އޭނަގެ ބައްޕަ ސަންޖޭ އަކީ އަނިލް ކަޕޫރާއި ބޯނީ ކަޕޫރްގެ ކޮއްކޮ އެވެ.