ރާއްޖޭގައި އޮތް އެންމެ ބޮޑު ޕާޓީއަކީ މިހާރު ޕީއެންސީ ކަމަށް ރައްޔިތުންގެ މަޖިލީހުގެ ރައީސް އަދި ޕީއެންސީގެ ޗެއާޕާސަން އަބްދުއްރަހީމް އަބްދުﷲ
ވިދާޅުވެއްޖެ އެވެ.
ޕީއެންސީގެ އޮފީހުގައި ރޭ އޮތް ފޯމު ހަވާލުކުރުމުގެ ރަސްމިއްޔާތުގައި ވާހަކަފުޅުދައްކަވަމުން އަބްދުލްރަހީމް ވިދާޅުވީ ރައީސް ޑރ. މުހައްމަދު މުއިއްޒު ވެރިކަމަށް ވަޑައިގެންނެވިއިރު ޕީއެންސީގައި ތިބީ 3،022 ކަމަށާއި ނަމަވެސް މިހާރު ޕީއެންސީ އަކީ ރާއްޖޭގެ އެންމެ ބޮޑު ސިޔާސީ ޕާޓީ ކަމަށެވެ.
"އެމަނިކުފާނުގެ ވެރިކަމަށް އެއް އަހަރު އަދި ނުފުރިގެން މި އުޅެނީ. މިހާރު އިރާދަކުރެވިއްޔާ ރާއްޖޭގައި އޮތް އެންމެ މެމްބަރުން ގިނަ ޕާޓީއަކީ ޕީއެންސީ،" އަބްދުލްރަހީމް ވިދާޅުވި އެވެ.
ޕީއެންސީން ހޯދަމުންދާ ކާމިޔާބީގެ އަސްލު ސަބަބަކީ ސިޔާސީ ޕާޓީއަކުން ވެރިކަން ކުރާއިރު ޕާޓީ އާއި ސަރުކާރާއި ދެމެދު އޮންނަންޖެހޭ ގުޅުމަކީ ކޮބައިކަން ދެނެވަޑައިގެން، މަޝްވަރާގެ ރިވެތި އުސޫލު އިސްކުރައްވައިގެން އަދި ޕާޓީގެ ލީޑަޝިޕާއި ޕާލަމެންޓްރީ ގްރޫޕާއެކު ރައީސް މުއިއްޒު ބާއްވާ ގާތް ގުޅުން ކަމަށްވެސް އަބްދުލްރަހީމް ވިދާޅުވި އެވެ.
މީގެކުރިން ވެރިކަމަށް އާދެވޭ ހިސާބުން މުޅިން ވެސް ފެނިފައި ހުރީ ޕާޓީ ގެއްލޭތަން ކަމަށާއި ސަރުކާރު ވެފައި އޮންނަނީ ވެރިކަމުގައި ހުންނަ ފަރާތާއި އެ ފަރާތެއްގެ ގާތް ބައެއްގެ އެއްޗަކަށް ކަމަށް އަބްދުލްރަހީމް ވިދާޅުވި އެވެ. ނަމަވެސް ރައީސް މުއިއްޒު ހިޔާރުކުރެއްވީ ދުނިޔޭގެ އެހެން ގައުމުތަކުގައި ވެސް ކަންކުރާ ގޮތަށް ޕާޓީ ނިޒާމަށް ވެރިކަން ކުރުމުގެ އުސޫލު ކަމަށްވެސް އޭނާ ވިދާޅުވި އެވެ.
ޕީއެންސީގެ މެމްބަރުންގެ އަދަދު 65،000 އަށް އަރާފައިވާ ކަމަށް އެ ޕާޓީން ހާމަކުރެ އެވެ. އަދި މި ސަރުކާރަށް އެއް އަހަރު ފުރުމާ ދިމާކޮށް 75،000 މެމްބަރުން ހަމަކުރަން ޕީއެންސީން އަންނަނީ ރާއްޖޭގެ އެކި ކަންކޮޅުތަކުގައި ހަރަކާތްތައް ބާއްވަމުންނެވެ.