އިނގިރޭސި ޕްރިމިއާ ލީގުގައި ރޭ އާސެނަލް އާއި ލިވަޕޫލް ބައްދަލުކުރި މެޗު 2-2 އިން އެއްވަރުވެއްޖެ އެވެ.
މި ނަތީޖާއާއެކު 9 މެޗުން 22 ޕޮއިންޓު ހޯދައިގެން ލިވަޕޫލް އޮތީ ދެވަނައިގަ އެވެ. އާސެނަލް އޮތީ 18 ޕޮއިންޓާ އެކު ލީގުގެ ތިންވަނައިގަ އެވެ. އެއްވަނައިގައި 23 ޕޮއިންޓާ އެކު އޮތީ މެންޗެސްޓާ ސިޓީ އެވެ.
އަމިއްލަ ދަނޑުގައި ކުޅުނު މި މެޗުގެ 9 ވަނަ މިނެޓްގައި ބުކާޔޯ ސަކާ ވަނީ އާސެނަލަށް ލީޑު ނަގައިދީފަ އެވެ. ލިވަޕޫލްގެ އޭރިއާ ތެރެއަށް ވަދެ ސަކާ ފޮނުވާލި ހަމަލާ އަމާޒުކޮށްލީ ގޯލުގެ މަތީ ދާގަނޑަށެވެ. ނަމަވެސް މެޗުގެ 18 ވަނަ މިނެޓްގައި ވާޖިލް ވެންޑައިކް ވަނީ ލިވަޕޫލަށް ނަތީޖާ އެއްވަރުކޮށްދީފަ އެވެ. އާސެނަލްގެ އޭރިއާ ތެރެއަށް ހުރަސްކޮށްލި ބޯޅަ ވެންޑައިކް ގޯލަށް ވައްދާލީ ބޮލުން ފޮނުވާލި ހަމަލާއަކުންނެވެ.
ފުރަތަމަ ހާފް ނިމުމުގެ ކުރިން އާސެނަލުން ވަނީ އަނެއްކާވެސް ލީޑު ނަގާފަ އެވެ. ޑެކްލަން ރައިސް ނަގައިދިން ހުރަހަކުން މި ގޯލު މެޗުގެ 43 ވަނަ މިނެޓްގައި ކާމިޔާބުކޮށްދިނީ މިކޭލް މެރީނޯ އެވެ. މިއީ އާސެނަލަށް އޭނާ ކާމިޔާބުކޮށްދިން ފުރަތަމަ ގޯލެވެ.
މި މެޗުގައި ދެވަނަ ފަހަރަށް ލިވަޕޫލުން ނަތީޖާ އެއްވަރުކުރީ މެޗުގެ 81 ވަނަ މިނެޓްގައި ޑާވިން ނުނޭޒް ތަނަވަސްކޮށްދިން ފުރުސަތަކުން މުހައްމަދު ސަލާ ކާމިޔާބުކުރި ގޯލުންނެވެ. މެޗުގެ ފަހު ވަގުތުކޮޅުތެރޭ އާސެނަލްގެ ކައި ހަވެޓްޒް ގޯލެއް ކާމިޔާބުކުރި ނަމަވެސް އެ ގޯލު ކާމިޔާބު ކުރުމުގެ ކުރިން އާސެނަލްގެ ޑިފެންޑަރަކު ލިވަޕޫލްގެ ކުޅުންތެރިއަކަށް ފައުލްކޮށްފައިވާތީ އެ ގޯލު ބަލައިގެންފައެއް ނުވެ އެވެ.
ޕްރިމިއާ ލީގުގައި ރޭ ކުޅުނު އެހެން މެޗުތަކަށް ބަލާއިރު، ޗެލްސީން ވަނީ އަމިއްލަ ދަނޑުގައި 2-1 އިން ނިއުކާސަލް ޔުނައިޓެޑް ބަލިކޮށްފަ އެވެ. ރަށުން ބޭރުގައި މެންޗެސްޓާ ޔުނައިޓެޑް 2-1 އިން ވެސްޓްހަމް ޔުނައިޓެޑް އަތުން ބަލިވިއިރު، ޓޮޓެންހަމްގެ މައްޗަށް 1-0 އިން ކުރި ހޯދައި ކްރިސްޓަލް ޕެލެސް އިން ވަނީ ލީގުގައި ފުރަތަމަ މޮޅު ހޯދާފަ އެވެ.