ސްޓެލްކޯގެ ސްލޯގަންއަކަށް "ތަރައްގީގެ ބައިވެރިޔާ" ހަމަޖައްސައި، އެކަން އިއުލާންކޮށްފި އެވެ.
ސްލޯގަން އިފްތިތާހުކޮށް ދެއްވީ މެނޭޖިން ޑިރެކްޓަރު ހުސައިން ފަހުމީ އެވެ.
ސްޓެލްކޯ އިން ސްލޯގަންއެއް ކަނޑައެޅި އިރު، އެ ކުންފުނިން ކަރަންޓުގެ ހިދުމަތް ދެމުންގެން ދެމުން އަންނަތާ އަންނަ ޑިސެންބަރު މަހަށް 75 އަހަރު ފުރޭނެ އެވެ. އެހެންވެ ސްލޯގަން އަކީ އެކަމާ ގުޅުވައި ބޭނުން ކުރަން ފެށި އެއްޗެއް ކަމަށް ސްޓެލްކޯ އިން ބުންޏެވެ.
މި ސްލޯގަންއިން ރަމްޒުކޮށް ދެނީ 1949 ވަނަ އަހަރު ރާއްޖޭގައި ކަރަންޓުގެ ހިދުމަތް ފެށިގެން މި ވޭތުވެދިޔަ މުއްދަތުގައި ގައުމީ ތަރައްގީގައި ސްޓެލްކޯއިން ވެފައިވާ ހިއްސާ ކަމަަށް އެ ކުންފުނިން ބުންޏެވެ. އެގޮތުން ގައުމީ ތަރައްގީގެ ދުވެލި ހަލުވިވެގެން ދިއުމުގައި ކަރަންޓުގެ ސިނާއަތާއި އެ ސިނާއަތުގައި ހިދުމަތް ދޭން އޮތް ކުންފުނީގެ ހައިސިއްޔަތުން ސްޓެލްކޯގެ ދައުރު މި ސްލޯގަންއިން ރަމްޒުކޮށް ދޭ ކަމަށް ބުންޏެވެ.
މީގެ އިތުރުން 1949 އިން ފެށިގެން ސްޓެލްކޯއިން އެކި ނަންނަމުގައި ދެމުން އައި ކަރަންޓުގެ ހިދުމަތުގެ އިތުރުން މިހާރު މި ކުންފުނިން ދެމުން އަންނަ ފެނާއި، ނަރުދަމާގެ ހިދުމަތާ އެކު ގައުމީ ތަރައްގީގައި ކުންފުނީގެ ހިއްސާ އިތުރުވެގެން ގޮސްފައިވާކަން ވެސް ސްލޯގަން ރަމްޒުކޮށްދޭ ކަމަށް އެ ކުންފުނިން ބުންޏެވެ.