އާސަންދައިގެ ދަށުން އާންމުކޮށް ދޫކުރާ 250 ބޭހެއްގެ އަގަށް ބަދަލުތަކެއް ގެންނަން ނިންމައިފި އެވެ.
ނެޝަނަލް ސޯޝަލް ޕްރޮޓެކްޝަން އޭޖެންސީ (އެންސްޕާ) އިން ރޭ ނެރުނު ބަޔާނެއްގައި ބުނީ އާސަންދަ އަކީ ފެންވަރު ރަނގަޅު ހިދުމަތްތަކެއް ދެވޭ އަދި ދެމެހެއްޓެނިވި ތަނަކަށް ހެދުމަށް ކުރަމުން އަންނަ މަސައްކަތުގެ ތެރެއިން އެންމެ އާންމުކޮށް ދޫކުރާ 250 ބޭހެއްގެ އަގު ބައި ބަޔަަށް ބަހާލައިގެން ބަދަލުގެންނަން ނިންމާފައިވާ ކަމަށެވެ.
އެގޮތުން އަންނަ މަހު 1 ފެށިގެން 87 ބޭހެއްގެ އަގަށް ބަދަލު ގެނެސްދި އަދި އަންނަ މަހު 24 އިން ފެށިގެން 126 ބޭހެއްގެ އަގަށް ބަދަލު ގެންނަން ނިންމާފައިވާ ކަމަށް ބުންޏެވެ.
އެންސްޕާ އިން ބުނީ މި ބަދަލާ އެކީ ކުރިން އަގުބޮޑުކޮށް ވިއްކަމުން ދިޔަ ބޭސްތަކުގެ އަގު ހެޔޮކުރެވި ބޭހަށް ކުރަމުން ދިޔަ ހަރަދުގެ ތެރެއިން 200 މިލިއަން ސަލާމަތް ކުރެވޭނެ ކަމަށެވެ.
އެ ކުންފުނިން ބޭހުގެ އަގަށް ގެންނަ ބަދަލާ ގުޅިގެން އާސަންދަ ސްކީމް މެދުވެރިކޮށް ބޭސް ލިބުމުގެ އިންތިޒާމަަށް އެއްވެސް ބަދަލެއް ނުގެނެސް ބޭސް ލިސްޓުގައި ހިމެނޭ ބޭސްތަކުގެ ކޮންމެވެސް އެއް ބްރޭންޑެއް އެސްޓީއޯގެ ފާމަސީތައް މެދުވެރިކޮށް ލިބެން ހުންނާނެ ކަމަށެވެ. އަދި އާސަންދަ ސްކީމްގައި ރަޖިސްޓްރީކޮށްފައިވާ އަމިއްލަ ފާމަސީތަކުގެ ތެރެއިން ބޭސްތައް ވިއްކުމަށް ރަޖިސްޓްރީކޮށްފައިވާ ފާމަސީތައް މެދުވެރިކޮށް ވެސް އިތުރު އަގަކާ ނުލައި މި ބޭސްތައް ލިބޭނެ އިންތިޒާމު ހަމަޖެހިފައި ހުންނާނެ އެންސްޕާ އިން ބުންޏެވެ.