ކާނާ ނުތާހިރުކޮށް ތައްޔާކުރުމާއި ގަސްތުގައި ކާނާ ނުތާހިރުކޮށް ވިއްކާ މައްސަލަ ބޮޑުވަމުންދާތީ އިންޑިއާގެ އެކި ސްޓޭޓްތަކުން މިހާރު އެފަދަ މައްސަލަތަކުގައި އަމަލު ކުރާނެ އުސޫލުތަކެއް އެކުލަވާލަން ފަށައިފި އެވެ.
ބައެއް ސްޓޭޓްކުން މިހާރު ވަނީ އުސޫލުތަކެއް އާންމު ވެސް ކޮށްފަ އެވެ. އެގޮތުން އުތުރާކަންތު ސްޓޭޓުން ވަނީ ނުތާހިރު ކާނާގެ މުއާމަލާތް ހިންގާ ފަރާތްތައް 100،000 ރުޕީސް (1،190 ޑޮލަރު) އިން ޖޫރިމަނާ ކުރަން ނިންމައިފަ އެވެ.
ސްޓޭޓްތަކުން ގަވައިދުތަކެއް އެކުވާލައި ފިޔަވަޅުތަކެއް އަޅަން ނިންމީ މަގުމަތީގައި ކާނާ ތައްޔާރުކޮށް ވިއްކާ ސްޓޯލްތަކާއި އެ ނޫން ވެސް އާދައިގެ ތަންތަނުން ނުތާހިރުކޮށް ކާނާ ތައްޔާރުކުރާ މަންޒަރު ފެންނަ ވީޑިއޯތަކެއް ސޯޝަލް މީޑިއާގައި ދައުރުވާން ފެށުމާ ގުޅިގެންނެވެ.
އެގޮތުން ބައެއް މީހުން ގަސްތުގައި ކާނާ އަށް ކުޅު ޖަހައި، ކުޑަކަމުދާ މަންޒަރު ފެންނަ ވީޑިއޯތަކެއް ވެސް ދައުރުވެފައިވެ އެވެ.
މިކަމާ ގުޅިގެން ވެރިކަން ކުރާ ޕާޓީ، ބީޖޭޕީން ވަނީ އެފަދަ އަމަލުތައް ހިންގާ ފަރާތްތަކަށް ހަރުކަށި ފިޔަވަޅުތައް އަޅަން ގޮވާލައިފަ އެވެ. އެގޮތުން އެފަދަ މުޑުދާރު އަމަލުތައް ހިންގާ މީހުން ބޮޑެތި އަދަދުތަކުން ޖޫރިމަނާކޮށް، ޖަލަށް ލާން ވެސް ގާނޫނާއި ގަވައިދުތަކެއް ހަދައި، އެ ތަންފީޒު ކުރަން ބީޖޭޕީ ސްޓޭޓްތަކަށް ގޮވާލާފައިވެ އެވެ.
އިންޑިއާގެ އިތުރުގެ މަޝްހޫރު ސްޓޭޓެއް ކަމަށްވާ އުއްތަރު ޕްރަދޭޝް ސްޓޭޓްގެ ސަރުކާރުން ބުނީ މިހާރު ގަވައިދުތަކެއް އެކުލަވާލައި ތަންފީޒު ކުރަން ތައްޔާރުވަމުން އަންނަ ކަމަށެވެ. އެގޮތުން ކާނާ ތައްޔާރުކޮށް ވިއްކާ ތަންތަން ގަވައިދުން މޮނިޓަކުރެވޭނެ ނިޒާމެއް ވަރަށް އަވަހަށް ގާއިމު ކުރެވޭނެ ކަމެއް އެ ސްޓޭޓުން ބުންޏެވެ.
އިންޑިއާ އަކީ އަބަދު ވެސް ކާނާގެ ރައްކާތެރިކަމާ ދޭތެރޭ ގިނަ ސުވާލު އުފައްދާ ގައުމެކެވެ.
އިންޑިއާގެ ފުޑް ސޭފްޓީ އެންޑް ސްޓޭންޑާސް އޮތޯރިޓީ (އެފްއެސްއެސްއޭއައި) އިން ބުނެފައިވާ ގޮތުގައި ނުތާހިރުކޮށް ތައްޔާރުކުރާ ކާނާގެ ސަބަބުން އަހަރަކު 600 މިލިއަން މީހުން ބަލިވާ އިރު، އެފަދަ މައްސަލަތަކުގައި އަހަރަކު 400،000 އެއްހާ މީހުން މަރުވެ އެވެ.