Last Updated: November 23, 21:29
Saturday, November 23, 2024
ޚަބަރު

ކުޅުދުއްފުށީގައި ވެސް އައިޑީ ކާޑު ހަދައި ދޭން ފަށަނީ

ކުޅުދުއްފުށިން ވެސް އައިޑީ ކާޑު ހެދޭނެ އިންތިޒާމު އަންނަ އަހަރު ހަމަޖެހޭނެ ކަމަށް ހޯމްލޭންޑް މިނިސްޓަރު އަލީ އިހުސާން ވިދާޅުވެއްޖެ އެވެ.

ރައްޔިތުންގެ މަޖިލީހުގެ މިއަދުގެ ޖަލްސާގައި އެ ސިޓީގެ އުތުރު ދާއިރާގެ މެމްބަރު މުހައްމަދު ދާއޫދު ކުރެއްވި ސުވާލެއްގެ ޖަވާބުގައި މިނިސްޓަރު ވިދާޅުވީ މީހުން ދިރިއުޅޭ ކޮންމެ އަތޮޅަކުން ނުވަތަ އަތޮޅުވެރިކަން ކުރާ ރަށަކުން އައިޑީ ކާޑުގެ ޚިދުމަތް ފޯރުކޮށް ދިނުމަކީ ރައީސް ޑރ. މުހައްމަދު މުޢިއްޒުގެ ވައުދެއް ކަމަށެވެ.

އެހެންވެ އެ މަގުން ޚިދުމަތް ފޯރުކޮށް ދިނުމަށްޓަކައިި ރަނގަޅު ނިޒާމެއް އެކުލަވާލައި ބައެއް އަތޮޅުތަކުގަ އައިޑީ ކާޑުގެ ޚިދުމަތް ފަށާފައިވާ ކަމަށާއި އަންނަ އަހަރުގެ ބަޖެޓުގައި ކުޅުދުއްފުށީގައި އައިޑީ ކާޑުގެ ޚިދުމަތް ފަށަން ކަނޑައަޅާފައިވާނެ ކަމަށް މިނިސްޓަރ ވިދާޅުވި އެވެ.

އިހްސާން ވިދާޅުވީ އައިޑީ ކާޑްގެ ޚިދުމަތް ދިނުމަށް ގާތްގަނޑަކަށް 120،000ރ. ޚަރަދުވާ އިރު، އެކަމަށް ބޭނުންވާ މެޝިނަރީޒް ލިބެމުންދާ ވަރަކުން އަތޮޅުތަލުން ޚިދުމަތް ދިނުމަށް މަސައްކަތް ކުރަމުން އަންނަ ކަމަށެވެ.

"އެހެންކަމުން އަޅުގަނޑުމެންގެ ޓައިމްލައިނަށް ވުރެ ކުރިން އައިޑީ ކާޑުގެ ޚިދުމަތް ފައްޓަވަން ބޭނުންވާ ނަމަ ސިޓީ ކައުންސިލުން އެދިވަޑައިގެންފި ނަމަ އެ ބޭނުންވާ މައުލޫމާތު އަޅުގަނޑުމެން ހިއްސާކުރާނަން،" މިނިސްޓަރު ވިދާޅުވި އެވެ. "އެއަށް ފަހު އެތަކެތި ހޯއްދަވައި ދެއްވީމަ އަޅުގަނޑުމެން އެ ޚިދުމަތް ފަށާނަން."

މާލެ އިން ބޭރުން ރާއްޖޭގެ ރަށެއްގައި އަލަށް އައިޑީ ކާޑު ހަދައި ދިނުމުގެ ހިދުމަތް ތައާރަފުކުރީ ގއ. ވިލިނގިލީގަ އެވެ. އެ ހިދުމަތް އެ ރަށުގައި ފެށީ މިދިޔަ މަހުގެ 18 ގަ އެވެ.