ތިބާ އަހަރެންގެ މަތިން ހަނދާން އެބަހުރި ހެއްޔެވެ؟ ނުވަތަ ދިރިތިބީން އެބައިމީހުންގެ ތެރެއިން މަރުވާ މީހުން މިހާ އަވަހަށް ހަނދާން ނައްތާލަނީ ހެއްޔެވެ؟ އަހަރެން ތިޔަބައިމީހުންނާއެކު ފާއިތުވި ރަމަޟާން މަހު އުޅުނު ކަން ހަނދާންވޭ ހެއްޔެވެ؟ ނަމާދު ކުރާ މީހުންގެ ސަފުތަކުގެ ތެރޭގައި، ރުކޫޢުކޮށް ސަޖިދަ ކުރުމުގައި އަހަރެން ވީމެވެ. ޚުޝޫޢަތްތެރިކަމާއެކު ތަރާވީޙް ނަމާދު އަދާ ކުރުން މަތީ ދެމި ހުރީމެވެ.
ރޯދަހިފާ މީހުންނާއި، ޛިކުރު ކުރާމީހުންނާއި، ﷲގެ މަގުގައި ހޭދަކުރާ މީހުންނާއެކުގައި އަހަރެން ވީމެވެ. އެއީ އަހަރެންގެ މުޅި ޢުމުރުގެ އެންމެ ފަހުގެ ރޯދަމަހަށް ވެދާނެކަމަށް އެއްގޮތަކަށްވެސް އަހަރެންނަކަށް ނޭނގެއެވެ. އެއީ އަހަރެން ތިބާ އާއި އެކީ ހޭދަކުރާ އެންމެ ފަހުގެ ރޯދަމަހަށް ވެދާނެކަމަކަށްވެސް ހިއެއް ނުކުރަމެވެ. އަހަރެންނަށް އެކަން އެނގުނުނަމަ އެއަށްވުރެ ގިނައިން ހެޔޮ ކަންތައް ކުރުމުގައި ޖޯޝާއި އެކީ ވަގުތު ހޭދަ ކުރީމުހެވެ. އަދި އަޅުކަންތައްތަކާއި ކިޔަމަންތެރިކަމުގެ ގޮތުން އަދާކުރަންޖެހޭ ކަންތައްތައް ކުރުމުގައި އެ މަހުގެ ހުރިހާ ވަގުތެއް ހޭދަ ކުރީމުހެވެ. އެއީ އަހަރެންގެ ޙަޔާތުގައި އަންނާނެ އެންމެ ފަހުގެ ރޯދަމަސް ކަމަށް ވެދާނެކަމަށް އަހަރެންނަށް އެނގުނުނަމަ ޖަމާޢަތުގެ ނަމާދަށް ފަރުވާތެރިވެ ވަގުތުގެ ކުރީކޮޅު މިސްކިތުގައި ޖަމާޢަތުގައި ނަމާދު ކުރި މީހަކު ކަމުގައި ތިބާއަށް އަހަރެން ފެނުނީހެވެ. އަދި އަހަރެން ތަރާވީޙް ނަމާދުގެ ޖަމާޢަތުގައި ބައިވެރިވުން ދޫނުކުރީމުހެވެ. އަދި ހެޔޮކަންތައް ލިބިގަތުމަށް ބުރަމަސައްކަތްކޮށް، ނުބައިކަންތައްތަކުން ރެކިގެން އެކަންތައް މަނާކުރަން އުޅުނު މީހެއް ކަމުގައި ތިބާއަށް އަހަރެން ފެނުނީހެވެ. އެހެން ނަމަވެސް….
އަހަރެން ޢީދު ނަމާދުގެ ފަހުގައި ތިބާއާއި ސަލާމް ކުރިކަން ތިބާ ފަހަރެއްގައި ހަނދާން ހުރެދާނެއެވެ. އެއީ އަހަރެންގެ އެންމެ ފަހުގެ ފިޠުރު ޢީދަށް ވާނެކަން އަހަރެންނަށް އެނގުނު ނަމަ އަހަރެން ތިބާއަށް ވަދާޢުގެ ސަލާމް ކުރީހީ އެއަށްވުރެ އަސަރާ އެކީގައެވެ.
އޭ އަހަރެންގެ ލޮބުވެތި އަޚުންނާއި އުޚްތުންނޭވެ!!! ތިޔަބައިމީހުންގެ ހެޔޮ ދުޢާތަކުގައި އަހަރެން ހަނދުމަ ކުރާށެވެ. ފަހެ އަހަރެންވަނީ ތިޔަބައިމީހުންގެ ދުޢާއަށް ފެންބޮވައިގެންފައެވެ. އަހަރެންނާއި އެންމެހާ މުސްލިމުންނަށް ﷲގެ ފާފަފުއްސެވުމާއި ރަޙްމަތް މިންވަރު ކުރެއްވުމަށް އެދި ދުޢާ ކުރާށެވެ.
ޢަމަލުގެ މައިދާނުގައި އަހަރެމެންވަނީ ތިޔަބައިމީހުންނާއި ވަކިވެ ގޮސްފައެވެ. އަހަރެމެން މި ދަތުރު ކުރަނީ ޢަމަލެއް ނެތް ޙިސާބު ބެއްލެވުމުގެ ޙަޔާތަށެވެ. ފަހެ ތިބާގެ ޙަޔާތުގެ ކޮންމެ މިނިޓެއް، ކޮންމެ ސިކުންތެއްގެ ފައިދާ އެންމެ ހެޔޮ ގޮތުގައި ލިބިގަންނާށެވެ. ވަގުތުގެ އަގު އެނގޭނީ އެ ވަގުތު ގެއްލުނު މީހުންނަށެވެ. ތިބާގެ އާޚިރަތުގެ ދަތުރަށް ބޭނުންވާ ކޮއްތު އެއްކޮށް ފުރިހަމަ ކުރާށެވެ. ފަހެ އެންމެ ހެޔޮ ރަނގަޅު ކޮއްތަކީ ތަޤުވާއެވެ. ތިބާގެ ޙަޔާތުން ފާއިތުވީތަނުން ޢިބުރަތް ޙާޞިލު ކުރާށެވެ. ފަހެ ހަމަކަށަވަރުން މަރު ތިބާއާއި ބައްދަލު ކުރާނެއެވެ. ތިބާގެ ކުރީގައި އެހެންމީހުންނާއި ބައްދަލު ކުރި ފަދައިންނެވެ. ދަންނާށެވެ. ހަމަކަށަވަރުން މި ދުނިޔެއަކީ ފާއިތުވެގެން ހިގައިދާނޭ ދުނިޔެއެކެވެ. ދެމިގެން ވަނީ އާޚިރަތުގެ ދިރިއުޅުމެވެ. ފަހެ ތިބާގެ ދާއިމީ ގޯތި އާބާދު ކުރާށެވެ.
އޭ ލޮބުވެތި އަޚުންނާއި އުޚްތުންނޭވެ! މިއީ ޙަޔާތުގައި ކުރިމަތިވާނޭ އެންމެ ފަހުގެ ރަމަޟާން މަސް ކަމުގައި ޚިޔާލު ކޮށްލާށެވެ. އަދި ރަމަޟާން މަހު ﷲ ގެ ރުއްސެވުން ލިބޭނެފަދަ ކަންތައް ކުރުމުގައި ހޭދަ ކުރާށެވެ. އަދި ރަމަޟާންމަސް ނިމުމަށްފަހު އޭގެ މަތީގައި ދެމި ތިބޭށެވެ.
އަދި ﷲ ތަޢާލާގެ މި ވަޙީ ބަސްފުޅުގައި ސިފަ ކުރައްވާފައިވާފަދަ ބައެއް ކަމުގައި ނުވާށެވެ. މަރު ވުމަށްފަހު ﷲ ގެ ޙަޟްރަތުގައި މިފަދައިން ދަންނަވާ މީހުންގެ ތެރެއިން ނުވާށެވެ. (( رب ارجعون لعلي أعمل صالحاً فيما تركت )) އޭ ހައްދަވާ ގެންގުޅުއްވާ އިލާހު! މިއަޅާ ނުކޮށް ދޫކޮށްލާފައިވާ ހެޔޮ ޢަމަލުތައް ކުރުމަށްޓަކައި މިއަޅާ އެނބުރި (ދުނިޔެއަށް) ފޮނުއްވާ ދެއްވާނދޭވެ.
ނޯޓް: މިއީ ނޫރުލް އިސްލާމް ވެބަސައިޓްގައި ޝެއިޚް މުޙައްމަދު އަނީލް ލިޔުއްވާފައިވާ ލިޔުމެކެވެ. 'އައްޑޫލައިވް' އިން މިލިޔުމަށް އެއްވެސް އުނިއިތުރެއް ގެނެސްފައެއް ނުވާނެއެވެ.