ސަރުކާރު ކުންފުނިތަކުގައި މަސައްކަތް ކުރާ މުވައްޒަފުންގެ މުސާރަތަކުގެ 10 ޕަސެންޓު ކުޑަކުރާއިރު، އެ ތަންތަނުގައި މަސައްކަތް ކުރާ ޕްރޮފެޝަނަލް މުވައްޒަފުން އިސްތިސްނާ ވާނެ ކަމަށް ފިނޭންސް މިނިސްޓަރު މޫސާ ޒަމީރު މިއަދު ވިދާޅުވެއްޖެ އެވެ.
މާލިއްޔަތު ކޮމިޓީގައި މިއަދު ވާހަކަދައްކަމުން ޒަމީރު ވިދާޅުވީ ޕްރޮފެޝަނަލް މުވައްޒަފުންގެ މުސާރައަށް ބަދަލެއް ނާންނާނެ ކަމަށާއި އެކަމަށް ރައީސް ޑރ. މުހައްމަދު މުއިއްޒު ވެސް ހުއްދަ ދެއްވާފައިވާ ކަމަށެވެ.
"އެއީ އަޅުގަނޑުމެން އެކްރޮސް ދަ ބޯޑް ބައެއް ކަހަލަ އިންޖިނިއަރުންނާއި ބައެއް ކަހަލަ މީހުންނަކީ އެއީ އަޅުގަނޑުމެން ސެލެރީ ދަށްކޮށްފި ކަމަށްވަންޏާ، އެމީހުންނަށް ބެޓާ އޮޕްޝަންސް އޮވެއްޖެއްޔާ ގޮސްފި ކަމަށްވަންޏާ ކުންފުނިތައް ހިންގަން އުނދަގޫވާނެ،" ޒަމީރު ވިދާޅުވި އެވެ.
ހަރަދު ކުޑަކުރަން ކުރިއަށް އޮތް ދެ އަހަރު ދުވަހުގެ މުއްދަތަކަށް ގިނަ ފިޔަވަޅުތަކެއް އެޅުމަށް ނިންމާފައިވާކަން ރައީސް ޑރ. މުހައްމަދު މުއިއްޒު ދާދިމުފަހުން ވަނީ އިއުލާންކުރައްވާފަ އެވެ. އޭގެތެރޭގައި ސިޔާސީ މުވައްޒަފުންނާއި ދައުލަތުގެ ވެރިންގެ މުސާރައިން 10 ޕަސެންޓް އުނިކުރުން ހިމެނެ އެވެ. އަދި ކުންފުނިތަކުގެ ވެރީންނަށް އެންމެ ބޮޑުކޮށް ދެވޭނީ 90،000 ރުފިޔާ ކަމަށް ކަނޑައެޅުން ވެސް ހިމެނެ އެވެ.
ރައީސް ވަނީ މި ފިޔަވަޅުތައް އެޅުމުގައި 12،000 ރުފިޔާއިން ދަށުން މުސާރަ ލިބޭ ފަރާތްތައް އިސްތިސްނާ ވާނެ ކަމަށް ވިދާޅުވެފަ އެވެ.