މ. މުލަކުގައި 500 ޓަނުގެ ކޯލްޑް ސްޓޯރޭޖް ފެސިލިޓީއެއް އެޅުމަށް އެއްބަސްވުމެއްގައި ސޮއިކޮށްފި އެވެ.
މިއަދު އެއްބަސްވުމުގައި ސޮއިކުރީ ފިޝަރީޒް މިނިސްޓްރީ އާއި ސައުދީ އަރަބިއްޔާގެ އާރްއޯއެސް ފޯ ޓްރޭޑިން ކޮމްޕެނީއާ ދެމެދު އެވެ. މިނިސްޓްރީގެ ފަރާތުން އެއްބަސްވުމުގައި ސޮއިކުރެއްވީ ޑިރެކްޓަ ޖެނެރަލް އީނާސް ނަސީރެވެ. އަދި އާރްއޯއެސްގެ ފަރާތުން ސޮއިކުރެއްވީ އެ ކުންފުނީގެ ޑެޕިއުޓީ ޑިރެކްޓަރު ހަމަދު މުޙައްމަދު އަލްމިންހާލީ އެވެ.
މި މަޝްރޫޢުގެ ދަށުން މުލަކުގައި އަޅާ 500 ޓަނުގެ ކޯލްޑް ސްޓޯރޭޖްގައި ދުވާލަކު 50 ޓަނު މަސް ބްރައިން ފްރީޒްކުރުމުގެ ޤާބިލުކަން ހުންނާނެ އެވެ. ސްޓޯރޭޖްގެ ޑިޒައިނިން މަސައްކަތާއެކު މި ފެސިލިޓީ އަޅައި ނިންމާނީ 300 ދުވަހުގެ ތެރޭގަ އެވެ.
މި މަޝްރޫއުގެ އަގަކީ 5.188 މިލިއަން ޑޮލަރެވެ.
ފިޝަރީޒް މިނިސްޓްރީން ބުނީ ކޯލްޑް ސްޓޯރޭޖް ފެސިލިޓީ ޤާއިމުކުރުމުން މުލަކު އަތޮޅުގެ މަސްވެރިންނަށް ބޮޑު ލުޔެއް ލިބި، މަސްވެރިކަމުގެ ސިނާޢަތަށް އިތުރު ކުރިއެރުމެއް ލިބޭނެ ކަމަށެވެ.