ޑައިރެކްޓަރި ސަންޖޭ ލީލާ ބަންސާލީގެ އާ ފިލްމު "ލަވް އެންޑް ވޯ" ގެ އަންނަ މަހުގެ 7 ގައި ފަށަން ނިންމާފައިވާ ކަމަށް ރިޕޯޓްތައް ބުނެފި އެވެެ.
ޕިންކްވިލާ އިން ބުނީ މުމްބާއީގެ ފިލްމުގެ މަންޒަރުތައް ނެގުމަށް ހިތްގައިމު ބޮޑު ސެޓެއް ވެސް ގާއިމުކޮށްފައިވާ ކަމަށާއި މިހާރު ޕްލޭންކޮށްފައި އޮތް ގޮތުން ޝޫޓިން އަންނަ މަހުގެ 7 ގައި ރަސްމީކޮޑް ފަށާނެ ކަމަށެވެ. "ލަވް އެންޑް ވޯ" ގެ ތަރިންނަކީ ރަންބީރް ކަޕޫރާއި އަންހެނުން އާލިއާ ބަޓްގެ އިތުރުން ވިކީ ކޯޝަލެވެ.
މިއީ ބަންސާލީ އެންމެ ފަހުން ގެނެސްދިންނ 2022 ގެ ގަންގޫބާއީ ކަތިއަވާޅީ" އަށް ފަހު، އާލިއާއާ އެކީ އޭނަ މަސައްކަތްކުރާ ދެވަނަ ޕްރޮޖެކްޓަކީ އެވެ. އެ ފިލްމަކީ އާލިއާ އަށް މޮޅު ބަތަލާގެ ނެޝަނަލް އެވޯޑް ވެސް ލިބުނު ފިލްމެކެވެ. އަދި "ލަވް އެންޑް ވޯ" އަކީ ރަންބީރާ އެކީ ވެސް ބަންސާލީ މަސައްކަތްކުރާ ދެވަނަ ފިލްމެވެ. އޭނަ ބޮލީވުޑަށް ނެރުނީ ކުޅަދާނަ ޑައިރެކްޓަރުގެ 2007 ގެ "ސާވަރިއާ" އިންނެވެ.
"ލަވް އެންޑް ވޯ" އަކީ ނެޝަނަލް އެވޯޑް ހޯދާފައިވާ އެކްޓަރު ވިކީ މުޅިން އަލަށް ބަންސާލީގެ ފިލްމެއްގައި މަސައްކަތްކުރާ ފުރަތަމަ ފަހަރެވެ. ބަތަލާ ކެޓްރީނާ ކައިފްގެ ފިރިމީހާ އަކީ މިހާރު ބޮލީވުޑްގެ އެންމެ ޑިމާންޑް ބޮޑު އެއް ތަރި އެވެ.
ބަންސާލީ ކުރިން ގެނެސްދިން ލޯބީގެ ފިލްމުތަކާ ވަރަށް ތަފާތު ވާހަކައެއް ކިޔައިދޭނެ "ލަވް އެންޑް ވޯ" ސިނަމާތަކަށް ގެންނަން ނިންމާފައި ވަނީ މާޗް 20، 2026 ގަ އެވެ.
ޕިންކްވިލާ އިން ބުނީ އަންނަ މަހު މި ފިލްމުގެ ޝޫޓިން މުމްބާއީގައި ފެށުމަށް ފަހު، އިންޑިއާގެ އެކި ހިސާބުތަކުގައި ފިލްމުގެ މަންޒަރުތަކެއް ނަގަން ހަމަޖެހިފައިވާ ކަމަށެވެ. އަދި ޕްލޭންކޮށްފައި އޮތީ އަންނަ އަހަރުގެ އޮކްޓޯބަރަށް ފިލްމުގެ ޝޫޓިން އެއްކޮށް ނިންމާށެވެ.