ފްރާންސުގެ މަޝްހޫރު ކުޅިވަރު މަޖައްލާ، ފްރާންސް ފުޓްބޯލް އިން ދެމުން އަންނަ ބެލޮންޑިއޯ އެވޯޑު ހަފްލާ ރެއާލް މެޑްރިޑުން ބޮއިކޮޓް ކޮށްފި އެވެ.
ފްރާންސްގެ ވެރިރަށް ޕެރިހުގައި މިރޭ ބޭއްވުމަށް ހަަމަޖެހިފައިވާ މި އެވޯޑު ހަފްލާ ރެއާލުން ބޮއިކޮޓް ކުރީ އެޓީމުގެ ބްރެޒިލް ވިންގާ، ވިނީޝަސް ޖޫނިއާ އަށް ބެލޮންޑިއޯ އެވޯޑު ނުލިބޭނެކަން ޔަގީންވުމާ ގުޅިގެން އެކަމާ ހިތްހަމަ ނުޖެހިގެން ކަމަށް ރިޕޯޓުތައް ބުނެ އެވެ. އެގޮތުން އެވޯޑު ހަފްލާ އަށް ރެއާލް މެޑްރިޑްގެ ރައީސް ފްލޮރެންޓީނޯ ޕެރޭޒް އާއި ވިނީޝަސް އާއި ޖޫޑް ބެލިންހަމް އަދި ކިލިއަން އެމްބާޕޭ ފަދަ ކުޅުންތެރިން ނުދާން ވަނީ ނިންމާފަ އެވެ.
ރިޕޯޓުތައް ބުނާގޮތުން މިރޭގެ ހަފްލާގައި ބެލޮންޑިއޯ އެވޯޑު ގެންދާނެ ކަމަށް އެންމެ ބޮޑަށް ބެލެވެނީ މެންޗެސްޓާ ސިޓީގެ ސްޕެއިން މިޑްފީލްޑަރު ރޮޑްރީ އެވެ.
މި އެވޯޑު ރޮޑްރީ ކާމިޔާބުކޮށްފިނަމަ އެއީ 2008 ވަނަ އަހަރަށް ފަހު އިނގިރޭސި ޕްރިމިއާ ލީގުގެ ކުޅުންތެރިއަކަށް މި އެވޯޑު ލިބޭ ފުރަތަމަ ފަހަރަށް ވާނެ އެވެ. އެންމެފަހުން ޕްރިމިއާ ލީގުގެ ކުޅުންތެރިއެއްގެ ގޮތުގައި މި އެވޯޑު ކާމިޔާބު ކުރީ މެންޗެސްޓާ ޔުނައިޓެޑަށް ކުޅުނު ކްރިސްޓިއާނޯ ރޮނާލްޑޯ އެވެ.
ބެލޮންޑިއޯ އެވޯޑު މިފަހަރު ހޯދާނެ ކަމަށް ކުރިން އެންމެ ބޮޑަށް ބެލެވިފައި އޮތީ މިދިޔަ ސީޒަނުގައި ރެއާލްއާއެކު ޗެމްޕިއަންސް ލީގު އަދި ސްޕެނިޝް ލީގު ހޯދި ވިނީޝަސް އެވެ. އޭނާ ވަނީ މިދިޔަ ސީޒަނުގައި 24 ގޯލު ކާމިޔާބުކޮށްފަ އެވެ.
މެންޗެސްޓާ ސިޓީގެ މެދުތެރޭގައި މުހިއްމު ރޯލެއް އަދާކުރަމުން އަންނަ ރޮޑްރީ ވަނީ މިދިޔަ ސީޒަނުގައި އެޓީމާއެކު ޕްރިމިއާ ލީގު ކާމިޔާބުކޮށްފަ އެވެ. އަދި ސްޕެއިނަށް ޔޫރޯ ފުޓްބޯޅަ މުބާރާތް ކާމިޔާބުކޮށްދިނުމުގައި ވެސް ރޮޑްރީ މުހިއްމު ދައުރެއް އަދާކުރި އެވެ. ޔޫރޯގެ އެންމެ މޮޅު ކުޅުންތެރިއަކީ ވެސް ރޮޑްރީ އެވެ.