މެންޗެސްޓާ ޔުނައިޓެޑްގެ ކޯޗު ކަމަށް ޕޯޗުގަލްގެ ރުބެން އަމޯރިމް ގެނައުމުގެ މަސައްކަތް ފަށައިފި އެވެ.
ސްޕޯޓިން ލިސްބަންގެ ކޯޗުކަމުގެ މަގާމުގައި ހުރި އަމޯރިމް ގެނައުމުގެ މަސައްކަތް ޔުނައިޓެޑުން ފެށީ އެ ކްލަބުގެ ކޯޗު ކަމުގެ މަގާމުގައި ހުރި އެރިކް ޓެން ހާގް މަގާމުން ވަކިކުރުމަށްފަހު އެވެ. ޓެން ހާގް މަގާމުން ވަކިކުރީ މި ސީޒަނުގައި ޔުނައިޓެޑުން ނެރެމުންދާ ދަށް ނަތީޖާތަކާ ގުޅިގެންނެވެ. ޔުނައިޓެޑް މިވަގުތު އޮތީ އިނގިރޭސި ޕްރިމިއާ ލީގުގެ 14 ވަނައިގަ އެވެ.
ޓެންހާގް ވަކިކުރުމަށްފަހު ޔުނައިޓެޑްގެ ކޯޗުކަމުގެ މަގާމު ވަގުގީ ގޮތުން ހަވާލުކޮށްފައިވަނީ ޓެންހާގްގެ އެސިސްޓެންޓެއްގެ ގޮތުގައި ހުރި ރޫޑް ވެން ނިސްޓަރޯއީއާ އެވެ.
ރިޕޯޓުތައް ބުނާގޮތުން އަމޯރިމް ގެންނަން ޔުނައިޓެޑުން ގާތްގަނޑަކަށް 20 މިލިއަން ޔޫރޯގެ ފީއެއް ސްޕޯޓިން އަށް ދައްކަންޖެހެ އެވެ. ނަމަވެސް ކުޑަ ފީއެއް ދައްކައިގެން އަމޯރިމް ގެންނަން ޔުނައިޓެޑުން ސްޕޯޓިންއާއެކު މަޝްވަރާތައް ކުރަމުންދާއިރު، ޔުނައިޓެޑަށް އަންނަން އަމޯރިމް ތައްޔާރަށް ހުރި ކަމަށް ރިޕޯޓުތައް ބުނެ އެވެ.
އަމޯރިމް ،39، ސްޕޯޓިންއާ ގުޅުނީ 2020 ވަނަ އަހަރު ކަމަށްވާއިރު، އޭނާގެ އިރުޝާދުގެ ދަށުން ކުޅެ އެޓީމުން ވަނީ ޕޯޗުގަލް ލީގު ދެ ފަހަރަށް ކާމިޔާބުކޮށްފަ އެވެ.
ޔުނައިޓެޑަށް ކުރިއަށް ދެން އޮތީ އިނގިރޭސި ލީގު ކަޕްގައި ލެސްޓަ ސިޓީއާ ދެކޮޅަށް ކުޅޭ މެޗެވެ. އޭގެފަހުން ލީގުގައި އަމިއްލަ ދަނޑުގައި އެޓީމު ދެން ނިކުންނާނީ ޗެލްސީއާ ދެކޮޅަށެވެ.