އާރްއެސްޑަބްލިޔު ސިސްޓަމް ނުވަތަ ލޮނުފެނުން މަސް ފިނިކުރާ ނިޒާމު އެޅުމަށް ދޫކުރަން ނިންމާފައިވާ ލޯނު މަޝްރޫއުގެ ދަށުން ފެސިލިޓީއަށް އެދޭ މަސްދޯނިތަކުގެ އިވޭލުއޭޝަން ފުރިހަމަކޮށް އަންނަ މަހުގެ 17 ގެ ކުރިން ފައިސާ ދޫކުރަން މަސައްކަތް ކުރަމުން އަންނަ ކަމަށް ފިޝަރީޒް މިނިސްޓަރު އަހުމަދު ޝިޔާމް ވިދާޅުވެއްޖެ އެވެ.
ފަރުމަހުގެ މަސްވެރިކަމުގެ ސިނާޢަތު ތަރައްޤީކުރުމުގެ ގޮތުން ދޫކުރާ ލޯނު ލިބުނު ފަރާތްތަކާއެކު ބޭއްވި ބައްދަލުވުމުގައި މިނިސްޓަރު ވިދާޅުވީ އާރްއެސްޑަބްލިޔު ފެސިލިޓީއަކީ ސަރުކާރަކުން މިހާތަނަށް އޮޑިވެރިންނަށް ހުޅުވާލާފައިވާ އެންމެ ފަހި ފުރުސަތު ކަމަށެވެ.
ޝިޔާމް ވިދާޅުވި ގޮތުގައި މީގެ ބޭނުމަކީ މަސްވެރިން ބާނާ މަސް ތާޒާކަންމަތީގައި ބެހެއްޓުމަށް އޮޑިވެރިންނަށް އެހީތެރިކަން ފޯރުކޮށް ދިނުމެވެ. އެގޮތުން މި ފެސިލިޓީގެ ސަބަބުން އޮޑިވެރިންނަށް ލިބޭނެ ފައިދާތަކުގެ ތެރޭގައި 35 ޕަސެންޓްގެ ޑިސްކައުންޓެއް ލިބޭނެ އެވެ. އަދި ރަހުނަކާ ނުލައި ދެ މިލިއަން ރުފިޔާއާ ހަމައަށް ރަހުނަކާ ނުލައި ފެސިލިޓީ ހަމަޖެހިގެން ދާނެ އެވެ.
މީގެ އިތުރުން، އާރްއެސްޑަބްލިޔު ސިސްޓަމާއެކު ބޭނުން ސައިޒެއްގެ ޖަނަރޭޓަރެއްވެ ސް ގަނެވޭނެ ކަމަށާއި، ފެސިލިޓީއަށް ހަ މަސްދުވަހުގެ ގްރޭސް ޕީރިއަޑެއް ލިބިގެންދާނެ އެވެ. އަދި ބަހާލައިގެން ފައިސާ އަނބުރާ ދައްކަން 10 އަހަރުގެ މުއްދަތެއް ވެސް ލިބޭނެ އެވެ.
މި ފެސިލިޓީގެ ދަށުން އަންނަ މަހުގެ 17 ކުރިން ފައިސާ ދޫކުރަން އަމާޒު ހިފި އިރު، އެއީ ރައީސް ޑރ. މުހައްމަދު މުއިއްޒުގެ ސަރުކާރަށް އެއް އަަހަރު ފުރޭ ތާރީހުކަން ފާހަގަކޮށްލެވެ އެވެ.
ލޯނަށް އެދުމުގެ ފުރުސަތު ހުޅުވާލާފައި އޮތީ އަންނަ މަހުގެ ނިޔަލަށެވެ.