އެންޓި ކޮރަޕްޝަން ކޮމިޝަން (އޭސީސީ)ގެ އިސްވެރިން އައްޔަނު ކުރުމުގެ ބާރު ރައީސުލްޖުމްހޫރިއްޔާއަށް ދިނުމަކީ ފާޑުކިޔޭނެ ކަމެއް ނޫންކަމަށް ރައްޔިތުންގެ މަޖިލީހުގެ ނައިބުރައީސް އަދި ދިއްގަރު ދާއިރާގެ މެންބަރު އަހުމަދު ނާޒިމް ވިދާޅުވެއްޖެ އެވެ.
ރައްޔިތުންގެ މަޖިލީހުގެ މިއަދުގެ ޖަލްސާގައި ވަނީ އެންޓި ކޮރަޕްޝަން ކޮމިޝަނުގެ ޤާނޫނަށް ހުށަހަޅާފައިވާ އިސްލާހުގެ ބަހުސް ކުރިއަށް ގެންގޮސްފަ އެވެ. ސަރުކާރުގެ ފަރާތުން މި އިސްލާހު ހުށަހަޅުއްވާފައިވަނީ ފެލިދޫ ދާއިރާގެ މެންބަރު އާދަމް ޒާހިރު އެވެ.
މި ބަހުސްގައި ވާހަކަ ދައްކަވަމުން މެންބަރު ނާޒިމް ވިދާޅުވީ، އޭސީސީގެ ރައީސް ހޮވާ އިޖުރާއަތު ބަދަލުކުރުމަށް ޤާނޫނަށް އިސްލާހު ހުށަހަޅާފައިވާ ގޮތަކީ އަލަށް ގެންނަ ބަދަލެއް ނޫން ކަމަށެވެ. ކުރީ ސަރުކާރުގައި ސިވިލް ސާވިސް ކޮމިޝަންގެ ރައީސް އައްޔަނު ކުރުމުގެ އިޖުރާއަތު މިގޮތަށް ބަދަލު ކޮށްފައިވާކަން ފާހަގަކޮށް ނާޒިމް ވިދާޅުވީ، ސީއެސްސީގެ ރައީސް އަކީ ޖުޑިޝަލް ސާވިސް ކޮމިޝަންގެ މެންބަރެއްގެ ގޮތުގައިވެސް އިންނަވާ ބޭފުޅެއް ކަމަށެވެ.
މިހާރު ހުށަހަޅާފައިވާ އިސްލާހަކީ އެއްވެސް ފަރާތަކަށް ފާޑުކިޔެން އޮތް ކަމެއް ނޫންކަން ފާހަގަކޮށް ނާޒިމް ވިދާޅުވީ، ކުރީ ސަރުކާރުން އޭސީސީގެ ފަސް މެންބަރުން އެއް ފަހަރާ ވެސް ބަދަލުކޮށްފައިވާ ކަމަށެވެ. ނާޒިމް ވިދާޅުވީ އޭސީސީ ރަނގަޅަށް ހިނގަންޖެހޭ ކަމަށާއި މިހާރު އެކޮމިޝަނުން ރަނގަޅަށް މަސައްކަތްކޮށް ކޮރަޕްޝަންގެ މައްސަލަތައް ހައްލުކުރާކަމަށް ރައްޔިތުން ގަބޫލު ނުކުރާ ކަމަށެވެ.
ނާޒިމް ވިދާޅުވީ އޭސީސީގެ މެންބަރުންނަށް ހިހޫތަނުން ކާލައިގެން އެއްވެސް ކަމެއް ނުކޮށް ތިބެން ދޫކޮށްލައިގެން ނުތިބެވޭނެ ކަމަށެވެ. އަދި ކޮރަޕްޝަންގެ ކަންކަން ހުއްޓޭތަނެއް ނުފެންނަ ކަމަށާއި އަދި މަދުވާތަންވެސް ނުފެންނަ ކަމަށް ވިދާޅުވި އެވެ. ރާއްޖޭގައި ކޮރަޕްޝަންގެ މައްސަލަތަކާއި ނާޖައިޒު މުއްސަނދިކަން ހޯދުން އިތުރުވެފައިވާކަން ފާހަގަކޮށް ނާޒިމް ވިދާޅުވީ އެފްއޭއެމްގެ ރައީސްވެސް ދެ އެޕާޓްމެންޓް ގަނެގެން އުޅުނުއިރުވެސް ކުރެވުނު ކަމެއްނެތް ކަމަށެވެ.
މި އިސްލާހުގައި ވާގޮތުން ކޮމިޝަންގެ ރައީސް ނުވަތަ ނާއިބު ރައީސަކު އައްޔަން ކުރުމަށް ބޭނުންވާ ކޮންމެ ފަހަރަކު، ކޮމިޝަނަށް މެންބަރުންގެ ތެރެއިން މީހެއް ނުވަތަ މީހުންގެ ނަން ރައީސުލްޖުމްހޫރިއްޔާ ރައްޔިތުންގެ މަޖިލީހަށް ހުށަހަޅަންވާނެ އެވެ. އެ ނަންތަކުގެ ތެރެއިން މަޖިލީހުން ފާސްކުރާ މީހަކު، ކޮމިޝަންގެ ރައީސްކަމުގެ މަގާމަށް ނުވަތަ، ނާއިބުރައީސް ކަމުގެ މަގާމަށް ރައީސުލްޖުމްހޫރިއްޔާ އައްޔަންކުރަންވާނެ ކަމަށްވެސް ބުނެފައިވެ އެވެ. ގާނޫނުގައި މިހާރު އޮންނަ ގޮތުން އެ ދެ ކޮމިޝަނަށް ވެސް ރައީސަކާއި ނާއިބު ރައީސަކު އައްޔަންކުރަނީ ކޮމިޝަންގެ މެންބަރުންގެ ތެރެއިން، އެ ކޮމިޝަންގެ މެންބަރުންނެވެ.