ރާއްޖޭގެ ކުޅަދާނަ ކެމެރާމަން ހަސަން ހަލީމް (ކޮކޯ) ޑައިރެކްޓްކުރި ފުރަތަމަ ފީޗާ ފިލްމު "ގެއްލުނު ރޭ" މިރޭ އޮލިމްޕަހުގައި ޕްރީމިއާކުރަން ތައްޔާރުވެއްޖެ އެވެ.
އޭނަގެ ދަރިފުޅު އަދި ލަވަކިޔުންތެރިޔާ އަންދަލާ ހަލީމް ޕްރޮޑިއުސްކޮށްފައިވާ މި ފިލްމަކީ އެ މިހުންގެ ފިލްމު ކުންފުނި ކޮކޯ ސްޓޫޑިއޯ އިން ގެނެސްދޭ ފިލްމެކެވެ.
"ގެއްލުނު ރޭ" އަކީ ރިޝްތާ ކިޔާ މީހެއްގެ ސްކްރީންޕްލޭއަކަށް ހަދާފައިވާ ފިލްމެކެވެ. މީގެ މައިގަނޑު ކާސްޓްގައި ހިމެނެނީ މުހައްމަދު މަނިކު، އައިމިނަތު ޝުހާ، އިބްރާހީމް ޖިހާދު (ޖިމީ)، މަރިޔަމް ޝިފާ، މަރިޔަމް ހަލީމް އަދި އަލަށް ތައާރަފުކުރާ ކުޑަކުއްޖެއް ކަމަށްވާ ކައުސަރު ހިމެނެ އެވެ.
"ގެއްލުނު ރޭ" މި އަހަރު އޮލިމްޕަހަށް ގެންނަ 11 ވަނަ ފިލްމެވެ. އެންމެ ފަހުން އެތަނުގައި ދެއްކީ މި މަހުގެ 7 ގައި ޕްރީމިއާކޮށް މި މަހުގެ 20 އާ ހަމައަށް ޝޯތައް ކުރިއަށް ގެންދޮޔަ ޑާކް ރެއިން އެންޓަޓައިންމަންޓްގެ ހޮރޯ-ކޮމެޑީ "ބިބީ" އެވެ.
"ގެއްލުނު ރެ" އަށް ފަހު ފަހު އޮލިމްޕަހަށް އަންނަން އޮތް ފިލްމަކީ އައި ފިލްމްސް އާއި ކަޒްމިކް އިންޓަނޭޝަނަލް ގުޅިގެން އަންނަ މަހުގެ 20 ގައި ގެނެސްދޭން ހަމަޖެހިފައިވާ "ދޭދަރު ރުއިން" އެވެ.