ފަސްޓްލޭޑީ ސާޖިދާ މުހައްމަދު މިހާރު ޓެންޒޭނިއާ އަށް ކުރައްވަމުން ގެންދަވާ ދަތުރުގައި އަންހެނުންނަށް ދިމާވާ މައްސަލަތަކަށް ހައްލު ހޯދުމާ ގުޅޭ ގޮތުން މަޝްވަރާކުރައްވައިފި އެވެ.
މި މަޝްވަރާ ކުރިއަށް ގެންދިޔައީ މެރކް ފައުންޑޭޝަން އެފްރިކާ އޭޝިއާ ލޫމިނަރީގެ 11 ވަނަ އަހަރީ ކޮންފަރެންސްގެ ޝަރަފުވެރި މެހެމާނުގެ ހައިސިއްޔަތުން ބައިވެރިވެ ވަޑައިގެންނެވުމަށް ޓެންޒޭނިއާއަށް މިހާރު ކުރައްވަމުން ގެންދަވާ ރަސްމީ ދަތުރުގެ ހަވާސާގައި އިއްޔެ މެރކް ފައުންޑޭޝަންގެ ސީއީއޯ ޑރ. ރަޝާ ކެލެޖްއާ އެކީ ބޭއްވި ބައްދަލުވުމުގަ އެވެ.
އަންހެނުންގެ ބާރުވެރިކަން އިތުރުކުރުމާއި ބަލިތަކަށް ފަރުވާ ދިނުމުގައި އެ ފައުންޑޭޝަނުން ފުޅާ ދާއިރާއެއްގައި މަސައްކަތް ކުރަމުން އަންނަ އިރު، ފައުންޑޭޝަނުން ހިންގާ ސްޕެޝަލިސްޓް ތަމްރީނު ޕްރޮގްރާމްތަކުގެ މައްޗަށް އަލިއަޅުއްވާލައި، އެ ދާއިރާތަކުން ޤާބިލުކަން އިތުރުކުރުމަށް އެހީތެރިކަން ފޯރުކޮށް ދިނުމާ ގުޅޭ ގޮތުން ފަސްޓްލޭޑީއާ މަޢުލޫމާތު ވެސް ޙިއްސާކޮށްފައިވެ އެވެ.
އެ ބައްދަލުވުމުގައި ސާޖިދާ ވަނީ ދުނިޔޭގެ އެކި ކަންކޮޅުތަކުގައި އަންހެނުންނަށް ދިމާވާ ގޮންޖެހުންތަކުގެ މައްޗަށް އަލިއަޅުއްވާލައްވައި، ޚާއްޞަކޮށް ދަރިމައިވުމުގެ މައްސަލަ ރާއްޖޭގެ ގިނަ އަންހެނުންނަށް ކުރިމަތިވެފައިވާކަން ފާހަގަކުރައްވައިފަ އަދި މިހާރުގެ ސަރުކާރުން އަންހެނުންގެ ޞިއްޙަތަށް އިސްކަންދެއްވާކަން ފާހަގަކުރައްވަމުން، ރާއްޖޭގައި ދަރިމައިވުމުގެ މައްސަލަތަކަށް ޙައްލު ދިނުމަކީ ރައީސް ޑރ. މުޙައްމަދު މުޢިއްޒުގެ މުހިންމު ވަޢުދެއް ކަމަށް ފަސްޓްލޭޑީ ވިދާޅުވި އެވެ.
ބައްދަލުވުމުގައި މެރކް ފައުންޑޭޝަންގެ ސީއީއޯ ވަނީ އަންހެނުންނަށް ދިމާވެފައިވާ މުހިންމު މައްސަލަތަކަށް ޙައްލު ހޯދުމަށް ފައުންޑޭޝަނުން އިތުރަށް މަސައްކަތްކުރެވިދާނެ ގޮތްތަކާ މެދު ވެސް މަޝްވަރާކުރައްވައިފަ އެވެ.