އެންޓި ކޮރަޕްޝަން ކޮމިޝަނުގެ ގާނޫނަށް ސަރުކާރުން ހުށަހަޅާފައިވާ އިސްލާހަކީ މިނިވަން މުއައްސަސާތަކަށް ރައީސް ޑރ. މުހައްމަދު މުއިއްޒު ފޮނުވާ ސިގްނަލެއް ކަމަށާއި މިއީ ސަރުކާރަށް ތާއީދުކުރާ މަޖިލީހުގެ މެންބަރުން ހައްދަވާ ގޯހެއް ކަމަށް ގަލޮޅު ދެކުނު ދާއިރާގެ މެންބަރު މީކާއިލް އަހުމަދު ނަސީމް ވިދާޅުވެއްޖެ އެވެ.
ރައްޔިތުންގެ މަޖިލީހުގެ މިއަދުގެ ޖަލްސާގައި އެންޓި ކޮރަޕްޝަން ކޮމިޝަނުގެ ގާނޫނަށް ސަރުކާރުން ހުށަހަޅާފައިވާ އިސްލާހަށް ވާހަކަ ދައްކަވަމުން މީކާއިލް ވިދާޅުވީ މިބިލަށް އިސްލާހު ކިޔުންވެސް ރަނގަޅު ނޫން ކަމަށެވެ. އެތައް ބަޔަކު ކުރި މަސައްކަތުން ގެނެވުނު ތިން ބާރު ވަކިވެފައިވާ ޑިމޮކްރަޓިކް ނިޒާމެއް ހަލާކުކޮށްލަން ފަހަތަށް އަޅާ ފިޔަވަޅަކަށް އިސްލާހު ކިޔަން ހެޔޮ ނުވާނެ ކަމަށް މީކާއިލް ވިދާޅުވި އެވެ.
20 ވަނަ ރައްޔިތުންގެ މަޖިލީހަށް ނުވަދިހައިގެ އަހަރުތަކުގައި ހުށަހެޅޭފަދަ ބިލުތައް ހުށަހެޅޭތީ ލަދުގަންނަކަމަށް މީކާއިލް ވިދާޅުވި އެވެ. މިހާރު ހުށަހެޅިފައިވާ އިސްލާހަކީ ހަމައެކަނި އިސްލާހެއް ނޫން ކަމަށާއި މިއީ ރައީސް ޑރ. މުހައްމަދު މުއިއްޒު ފޮނުވާ ސިގުނަލެއް ކަމަށް މީކާއިލް ވިދާޅުވި އެވެ.
"އޭސީސީއަށް ވެސް އަދި އެހެން މިނިވަން މުއައްސަސާތަކަށްވެސް ރައީސް މުއިއްޒު ފޮނުއްވާ ސިގްނަލެއް. ތިމަންނާ ބޭނުންގޮތަށް ތި މުއައްސަސާތަކުން އަމަލު ނުކުރާކަމަށްވަންޏާ ކަނޑާލާނަމޭ. މިއީ ފުރަތަމަ ފިޔަވަހި." މީކާއިލް ވިދާޅުވި އެވެ.
2014 އިން 2019 އަށްވެސް މަޖިލީހުގައި ޕީޕީއެމްގެ މެޖޯރިޓީ އޮތްކަން ފާހަގަކޮށް މީކާއިލް ވިދާޅުވީ އޭރުގެ ސަރުކާރުން ޑިމޮކްރަސީއާ ބީރައްޓެހި ބިލްތައް ހުށަހެޅުމުން އޭރުގެ މެންބަރުންވެސް އެ ބިލުތަކަށް ތައުރީފުކޮށް ވާހަކަ ދެއްކި ކަމަށެވެ. އެހެންނަމަވެސް ދައުރުގެ ފަހުކޮޅު އެ މެންބަރުން މަޖިލީހުގެ ފާރުމަތިން އުކާލި މަންޒަރު ފެނުނުކަން ފާހަގަކޮށް މީކާއިލް ވިދާޅުވީ މަޖިލީހުގައި މިހާރު ތިބި ސަރުކާރަށް ތާއިދު ކުރާ މެންބަރުންނަށް މިހާރު ހައްދަވަނީ އެފަދަ ގޯހެއް ކަމަށެވެ.
"އާދޭސް ކޮށްފައި މިދަންނަވަނީ، ތިޔަ ހައްދަވަނީ ގޯހެއް." މީކާއިލް ވިދާޅުވި އެވެ.
ސަރުކާރުން އެންޓި ކޮރަޕްޝަން ކޮމިޝަނުގެ ގާނޫނަށް ހުށަހަޅާފައިވާ އިސްލާހުގައި ވާގޮތުން ކޮމިޝަންގެ ރައީސް ނުވަތަ ނާއިބު ރައީސަކު އައްޔަން ކުރުމަށް ބޭނުންވާ ކޮންމެ ފަހަރަކު، ކޮމިޝަނަށް މެންބަރުންގެ ތެރެއިން މީހެއް ނުވަތަ މީހުންގެ ނަން ރައީސުލްޖުމްހޫރިއްޔާ ރައްޔިތުންގެ މަޖިލީހަށް ހުށަހަޅަންވާނެ އެވެ. އެ ނަންތަކުގެ ތެރެއިން މަޖިލީހުން ފާސްކުރާ މީހަކު، ކޮމިޝަންގެ ރައީސްކަމުގެ މަގާމަށް ނުވަތަ، ނާއިބުރައީސް ކަމުގެ މަގާމަށް ރައީސުލްޖުމްހޫރިއްޔާ އައްޔަންކުރަންވާނެ ކަމަށްވެސް ބުނެފައިވެ އެވެ. ގާނޫނުގައި މިހާރު އޮންނަ ގޮތުން އެ ދެ ކޮމިޝަނަށް ވެސް ރައީސަކާއި ނާއިބު ރައީސަކު އައްޔަންކުރަނީ ކޮމިޝަންގެ މެންބަރުންގެ ތެރެއިން، އެ ކޮމިޝަންގެ މެންބަރުންނެވެ.