ކުރިއަރަމުން އަންނަ ބޮލީވުޑްގެ ޒުވާން އެކްޓަރު ސިދާންތު ޗަތުރަވެދީ ކޮމެޑީ ފިލްމަކަށް ތައްޔާރުވަމުން އަންނަ ކަމަށް ރިޕޯޓްތައް ބުނެފި އެވެ.
ފިލްމީ ޚަބަރުތައް ގެނެސްދޭ މީޑިއާތަކުން ބުނީ އަދިި ނަން ސާފު ނުވާ މި ފިލްމަކީ ޕްރޮޑިއުސަރު މަހާވީރު ޖެއިން އާއި މުރްގްދީޕް ސިންގް ލާމްބާ ޕްރޮޑިއުސްކުރާ ފިލްމެއް ކަމަށެވެ. އަންނަ އަހަރުގެ ކުރީކޮޅު ޝޫޓިން ފަށަން ޕްލޭންކޮށްފައިވާ މި ފިލްމުގެ ޑައިރެކްޓަރަކަކީ އަލަށް ފީޗާ ފިލްމެއްގެ ޑައިރެކްޝަނާ ހަވާލުވި ޓީވީ އިޝްތިހާރުތައް ހަދާ އަމްބަރު ޗަކްރަވަތީ އެވެ.
ސިދާންތާ އެކީ ފިލްމުގައި ދެ ބަތަލާއިން ހިމެނޭނެ އެވެ. ބޮލީވުޑް ހަންގާމާ އިން ބުނި ގޮތުގައި ބަތަލާއިންނަކީ ނޯރާ ފަތުހީ އާއި އިންޑިއާގެ ދެކުނުގެ ބަތަލާ ސްރީލީލާ އެވެ.
ދެހާސް ނަވާރައިގެ "ގަލީ ބޯއި" އިން ބޮލީވުޑަށް ނުކުތް ސިދާންތު، 31، ގެ އެންމެ ފަހުގެ ފިލްމަކީ މިދިޔަ މަހު ރިލީޒްކުރި އެކްޝަން ތުރިލާ "ޔުދްރާ" އެވެ. އޭނަ ދެން އެންމެ އަވަހަށް ފެންނާނީ އަންނަ އަހަރުގެ ކުރީކޮޅު ރިލީޒްކުރަން ހަމަޖެހިފައިވާ ލޯބީގެ ފިލްމު "ދަޅަކް 2" އިންނެވެ.
ސިދާންތުގެ ކުރިއަށް ހުރި ޕްރޮޖެކްޓްތަކުގެ ތެރޭގައި ސަންޖޭ ލީލާ ބަންސާލީ ޕްރޮޑިއުސްކުރާ "ތުމް ހީ ހޯ" އާއި ޑައިރެކްޓަރު ވިކާސް ބާލްގެ އާއިލީ ލޯބީގެ ފިލްމު "ދަރުވާޒާ" ހިމެނެ އެވެ.