މަސްވެރިންގެ ގައުމީ ދަފުތަރުގެ މަސައްކަތް މި މަހުގެ ނިޔަލަށް ނިންމައިލަން އަމާޒު ހިފާފައިވާ އިރު، ދަފުތަރުގައި މިހާތަނަށް 300 އަށް ވުރެ ގިނަ މަސްވެރިން ރަޖިސްޓްރީކޮށްފި އެވެ،
މި މަސައްކަތް ފިޝަރީޒް މިނިސްޓްރީން އިފުތިތާހުކުރޫ މި އަހަރުގެ ފެބްރުއަރީ 12 ގަ އެވެ. މިނިސްޓްރީން ބުނި ގޮތުގައި ރަޖިސްޓްރޭޝަން އަވަސް ކުރުމަށް މިނިސްޓްރީގެ ޓީމްތައް ރާއްޖޭގެ އެކި އަތޮޅުތަކަށް ޒިޔާރަތްކޮށްގެން ވެސް ރަޖިސްޓްރީ ކުރުން ކުރިއަށް ގެންގޮސްފައިވާ އިރު، މިހާތަނަށް ޖުމްލަ 305 މަސްވެރިން ދަފުތަރުވެފައިވާ ކަމަށެވެ.
މަސްވެރިން ދަފުތަރު ކުރަނީ އެންޑްރޮއިޑާއި އައިއޯއެސް ފޯނުތަކުގައި ބޭނުންކުރެވޭ 'ކެޔޮޅު' އެޕްލިކޭޝަނުންނެވެ.
މަސްވެރިންގެ ދަފުތަރެއް އެކުލަވާލުމުގެ ބޭނުމަކީ އެހެނިހެން ދާއިރާތަކުގެ މަސައްކަތްތަކާ އެއްގޮތަށް ދަޢުލަތުން ބަލައި ގަންނަ ޢާމްދަނީ ލިބޭ މަސައްކަތެއްކުރާ ބައެއްގެ ގޮތުގައި މަސްވެރިން ކަނޑައެޅުމަށެވެ.