މަލައިކާ އަރޯރާއާ ރުޅިވެފައިވާކަން ބޮލީވުޑްގެ އެކްޓަރު އަރުޖުން ކަޕޫރް ކަށަވަރުކޮށް ދީފ އެވެ.
އޭނަ ވިލަންގެ ރޯލު ކުޅެފައިވާ އަދި އަންނަ މަހުގެ 1 ގައި ރިލީޒްކުރަން ތައްޔާރުވަމުން އަންނަ އަޖޭ ދޭވްގަންގެ "ސިންގަމް އެގެއިން" ގެ ޕްރޮމޯޝަންގެ ތެރެއިން މީޑިއާއަކާ ވާހަކަ ދައްކަމުން އަރުޖުން ބުނީ "މިހާރު ހުރީ ސިންގަލްކޮށް" ކަމަށެވެ.
ނަމަވެސް އެކަމާ ގުޅޭ ގޮތުން އިތުރު އެއްވެސް އެެއްޗެއް ނުބުނެ އެވެ.
އަރުޖުން އާއި މަލައިކާ ރުޅިވެއްޖެކަމުގެ ވާހަކަތަކެއް އެންމެ ފަހުން މީޑިއާތަކުގައި ދެކެވުނީ މި އަހަރުގެ މެއި މަހުގެ ތެރޭގަ އެވެ. އޭގެ ކުރިން އެކިއެކި އިވެންޓްތަކުން އާންމުކޮށް އެކީގައި ފެންނަ އެ ދެ މީހުން ފަހުން އެއްވެސް ތަނަކުން އެކީގައި ނުފެންނާތީ އެ ގުޅުން ރަސްމީކޮށް ނިމުމަކަށް އައިސްފައިވާ ކަމަށް މީޑިއާތަކުން ދިޔައީ ރިޕޯޓްކޮށްފި އެވެ.
އެ ގުޅުން ނިމުމަކަށް އައި އިރު، މީގެ ކުރިން އެތައް ފަހަރެއްގެ މަތިން އެ މީހުންގެ ކައިވެނީގެ ވާހަކަތަކެއް ވެސް ދެކެވިފައިވެ އެވެ.
އަރުޖުން، 39، އާއި މަލައިކާ، 50، ރައްޓެހިވީ 2018 ގަ އެވެ. މިހާރު އުމުރުން 22 އަހަރުގެ ކުއްޖަކު ވެސް ހުރި މަލައިކާ އަކީ ސަލްމާން ޚާންގެ ކޮއްކޮ އަރްބާޒް ޚާންގެ ކުރީގެ އަންހެނުންނެވެ. އެ ދެ މީހުން 1998 ގައި ކުރި ކައިވެނި ރޫޅައިލީ 2017 ގަ އެވެ.
އަދި މިދިޔަ އަހަރު އަރްބާޒް ވަނީ ޝޫރާ ޚާން ކިޔާ މޭކަޕް އާޓިސްޓަކާ ކައިވެނިކޮށްފަ އެވެ.
މަލައިކާގެ ކުރިން އަރުޖުން ރައްޓެހިވި ބަތަލާ ސޮނާކްޝީ ސިންހާގެ އިތުރުން ސަލްމާން ޚާންގެ ކޮއްކޮ އަރްޕިތާ ޚާނާ އެވެ. މިހާރު ދެ ކުދިން ވެސް އަރްޕިތާ އަކީ އެކްޓަރު އާޔޫޝް ޝަރުމާގެ އަންހެނުންނެވެ.
އަރުޖުން އަކީ މަޝްހޫރު އެކްޓަރު އަނިލް ކަޕޫރްގެ ބޭބެ އަދި ކުރީގެ ބަތަލާ ސްރީދޭވީގެ ފިރިމީހާ ޕްރޮޑިއުސަރު ބޯނީ ކަޕޫރްގެ ހަމައެކަނި ފިރިހެން ދަރިފުޅެވެ. ބަތަލާއިން ކަމަށްވާ ޖާންވީ ކަޕޫރާއި ހުޝީ ކަޕޫރަކީ އަރުޖުންގެ އެއްބަފާ ކޮއްކޮއިންނެވެ.