ހިޒުބްﷲ ޖަމާއަތުގެ އާ ލީޑަރަކަށް ނައިމް ގައްސާމް އައްޔަންކޮށްފި އެވެ.
މިކަމާ ގުޅޭ ގޮތުން އެ ޖަމާއަތުގެ އިސް ކައުންސިލުން މިއަދު ނެރުނު ބަޔާނެއްގައި ބުނީ އާ ލީޑަރަކީ އިސްލާމް ދީނުގެ ދިފާއުގައި މަސައްކަތް ކުރައްވާނެ އަދި ރަސޫލާ ގެނެސްދެއްވި ދީން ހިމާޔަތްކޮށް އެ ދީނުގެ ތަރަހައިގެ މަތީގައި ސާބިތުވެ ހުންނަވާނެ ބޭފުޅެއް ކަމަށެވެ.
އަދި ގައްސާމާ އެކު ހިޒުބްﷲ ގެ ޖޯޝާއި ހިތްވަރު އިތުރަށް އާވެ، ވަރުގަދަވާނެ ކަމަށް ވެސް ހިޒްބުﷲ އިިން ބުންޏެވެ. އެ ޖަމާއަތުގެ އެންމެ އިސް ލީޑަރަކަށް ގައްސާމް އައްޔަންކުރުމުގެ ކުރިން ވެސް އޭނަ އަކީ ޖަމާތުގައި ވަރަށް އިސް ކޮމާންޑަރެކެވެ.
ހިޒްބުﷲ ގެ އާ ލީޑަރަކަށް ގައްސާމް ހަމަޖެއްސީ މިދިޔަ މަހުގެ 27 ގައި އެ ޖަމާއަތުގެ ލީޑަރު ނަސްރުﷲ ހަސަން އިޒްރޭލުގެ ހަމަލާތަކެއްގައި އަވަހާރަކޮށްލުމާ ގުޅިގެންނެވެ. އޭގެ ފަހުން ލީޑަރަކަށް އައްޔަންކުރަން ނިންމި ހާޝިމް ސައިފުއްދީން ވެސް މި މަހުގެ 3 ގައި އިޒްރޭލުން ވަނީ އަވަރާހަކޮށްލައިފަ އެވެ.
ޔަހޫދީން މިދިޔަ މަހުގެ ތެރޭގައި ލުބްނާނަށް އަރައި ގަނެ، އެ ގައުމު ސުންނާފަތި ކުރުމުގެ މަސައްކަތް ކުރަމުންދާ އިރު، ހަމަލާތައް އެންމެ ބޮޑަށް އަމާޒު ކުރަނީ ހިޒްބުﷲ ގެ ވެރިންނަށެވެ. ނަމަވެސް ހަމަލާތަކުގައި މިހާތަނަށް އާންމުންގެ އެތައް ބައެއްގެ ފުރާނަ ވެސް ވަނީ ގެއްލިގެން ގޮސްފަ އެވެ.