ރީތީގެ މުބާރާތްތަކުގައި ބައިވެރިވުމަކީ ބޮޑު ފާފައެއް ކަމަށާއި އެކަން ހުއްޓުވަން ޖެހޭ ކަމަށް ދީނީ ޢިލްމުވެރިޔާ ޝެއިޚް އަބްދުއްސަލާމް ދާއޫދު ވިދާޅުވެއްޖެ އެވެ.
އަންނަ މަހު މެކްސިކޯގައި ބާއްވާ މި އަހަރުގެ މިސް ޔުނިވާސް މުބާރާތުގައި ރާއްޖެ އިން ވާދަކުރާތީ އެކަމާ ގުޅިގެން ކުރެވުނު ސުވާލެއްގެ ޖަވާބުގައި ދާރިސް ޓީވީ ގެނެސްދޭ "އިލްމީ ހަޒާނާ" ގެ ރޭ ޕްރޮގްރާމްގައި ޝެއިހް ވިދާޅުވީ ރީތީގެ މުބާރާތްތަކުގެ އެންމެ މައިގަނޑު އެއް މަގުސަދަކީ އެތަކެއް ބައެއްގެ ކުރިމަތީގައި އަންހެނާގެ ހަށިގަނޑާއި އޭނަގެ ވަނާތައް ހާމަކުރުން ކަމަށެވެ.
"ރަސޫލާ ހަދީސް ކުރައްވާފައިވޭ، އަންހެނާ އަކީ އައުރައެކޭ. މާނައަކީ ރައްކާތެރިވާން ޖެހޭ ބޭކަނބަލެކޭ،" ޝެއިހް ވިދާޅުވި އެވެ. "އަންހެނާ މަގު މައްޗަށް ނުކުމެއްޖެއްޔާ، މާނަ އަކީ އޭނާ ގެއިން ބޭރަށް ނުކުމެއްޖެއްޔާ، ވަރިހަމަ ކިތަންމެ ނިވާވެގެން ވިޔަސް، ނުކުމެއްޖެއްޔާ ޝައިޠާނާ އޭނާގެ މައްޗަށް ފާވެގަންނާނޭ."
އޭނަ ވިދާޅުވީ މިކަން އޮތުމާ އެކު ކަމާކަން ފަށައި، ބަރަހަނާވާންވެގެން، ތިމާގެ ގުނަވަންތައް ދައްކަންވެގެން ނުކުންނަ ނުތުމަކީ މުއުމިނުންގެ މެދުގައި ފާހިޝް ޢަމަލު ފެތުރުމަށް ލޯބިކުރެވޭ ލޯބިކުރެވުމަކަށް ވެގެންދާނެ ކަމެއް ކަމަށެވެ.
އެހެންވެ އެފަދަ ކަންކަމުގައި އަންހެނުން ބައިވެރި ކުރުވަން ގެންދަން މަސައްކަތް ކުރާ ފަރާތްތަކުން، އެ މަސައްކަތް ހުއްޓާލައި، މާތް الله އަށް ބިރުވެތިވުމަށް ޝެއިޚް ގޮވާލެއްވި އެވެ.
”މާތް الله ވަޙީ ކުރައްވާފައިވާ ބަސްފުޅެއްގެ މާނައިގައި ވޭ، އީމާން ކަމުގެ އަހުލުވެރިންގެ ތެރޭގައި ފާހިޝް ޢަމަލުތައް ފެތުރުމަށް ލޯބިކުރާ މީހުންނަށް، ދުނުޔެއާއި އާޚިރަތުގައި ވޭންދެނިވި އަޒާބު ދެއްވާނެ ކަމަށް.“ ޝެއިހް ވިދާޅުވި އެވެ. އެހެންވީމާ ތިފަދަ ކަން ކަމަކީ ދުނިޔޭގައި ވެސް މާތް الله ގެ ކޯފާއާއި ކުރިމަތިލާން ޖެހޭނެ ކަމެކޭ ތިފަދަ ކަންކަމުގަ ކުރިމަތި ލުމަކީ. އަދި މުބާރާތުގައި ބައިވެރި ކޮށްދޭ ފަރާތާއި އެފަރާތުގެ އާއިލާއަށްވެސް އަޅުގަނޑު ދަންނަވާނީ، الله އަށް ބިރުވެތިވާށޭ. ތިމާގެ ހިސާބުގައި، އަދި ތިމާމެންގެ ހިސާބުގައި ލިޔެވިގެންދާ ބޮޑެތި ފާފަ ތަކުގެ ތެރޭގައި ހިމެނޭނެ ކަމެކޭ."
އޭނަ ވިދާޅުވީ ރާއްޖެ ސައްތައިން ސައްތަ މުސްލިމް ގައުމެއްގެ ގޮތުގައި ރާއްޖެ އޮތް ރާއްޖޭގެ ނަމުގައި އެފަދަ ކަންކަމުގައި ބައިވެރިވުމަކީ ހިތާމަ ކުރަންޖެހޭ ކަމެއް ކަމަށެވެ. އެހެންވެ މިފަދަ ހާލަތެއްގައި ދައުލަތުގެ ކަންކަމާއި ހަވާލުވެވަޑައިގެން ތިއްބެވި ފަރާތްތަކުން ވެސް، މާތް الله އަށް ބިރުވެތިވެ، މިކަންކަން ހުއްޓުވުމަށް މަސައްކަތް ކުރަން ޖެހޭނެ ކަމަށް ޝެއިހް ވިދާޅުވި އެވެ.
މިސް ވޯލްޑް ފިޔަވައި ދުނިޔޭގައި ބާއްވާ އެންމެ ބޮޑު ރީތީގެ މުބާރާތުގައި ރާއްޖެ ތަމްސީލު ކުރަން ހަމަޖެހިފައި ވަނީ 21 އަހަރުގެ މޮޑެލްއެއް ކަމަށްވާ މަރިޔަމް ޝައިނާ ނަސީމެވެ.
🇲🇽 Cónsul at @EmbaMexInd, Diego Pérez, granted a visa to 🇲🇻 contestant Maryam S. Naseem who will represent Maldives in Miss Universe 2024 in 🇲🇽. This is the first time in the history of this competition that Maldives participates. @EmbaMexInd wishes her the best. pic.twitter.com/zPTi3wPOJH
— Embassy of Mexico in India 🇲🇽 (@EmbaMexInd) October 29, 2024
މި އަހަރު ބާއްވާ 73 ވަނަ މިސް ޔުނިވާސް މުބާރާތް އޮންނާނީ އަންނަ މަހުގެ 16 ގައި މެކްސިކޯގެ ވެރިރަށް، މެކްސިކޯ ސިޓީގަ އެވެ.
ރާއްޖެ ހިމެނެނީ މި މުބާރާތުގައި މި އަހަރު އަލަށް ވާދަކުރާ 11 ގައުމުގެ ތެރޭގަ އެވެ. އެ ލިސްޓްގައި ދެން ހިމެނީ އިރާން، ޔޫއޭއީ، މަކާއޯ، ބެލާރުސް، އުޒްބެކިސްތާން، އެރިތުރިއާ، މޮލްޑޯވާ، އުތުރު މެސެޑޯނިއާ، ސޯމާލިއާ އަދި ގިނީ އެވެ.
މިސް ޔުނިވާސް މުބާރާތުގައު 130 އަށް ވުރެ ގިނަ ގައުމުން ވާދަކުރެ އެވެ.