48 ގަޑިއިރުތެރޭ މަސްވެރިންނަށް ފައިސާ ދިނުމަށް މިސަރުކާރުން ވެފައިވާ ވައުދަށް ނުފިލާނެ ކަމަށް ފިޝަރީޒް މިނިސްޓަރު އަހުމަދު ޝިޔާމް ވިދާޅުވެއްޖެ އެވެ.
ރައްޔިތުންގެ މަޖިލީހުގެ މިއަދުގެ ޖަލްސާގައި މިނިސްޓަރު ޝިޔާމަށް ސުވާލު ކުރުމަށް ލިބުނު ފުރުސަތުގައި މަރަދޫ ދާއިރާގެ މެންބަރު އަހުމަދުދީދީ ވަނީ، 48 ގަޑިއިރު ތެރޭ މަސްވެރިންނަށް ފައިސާ ދެވޭގޮތް ހެދުމަކީ މިސަރުކާރުގެ ވައުދެއްކަން ފާހަގަކޮށް އެކަން އަދިވެސް ނުވާތީ އެ ވައުދު ތަންފީޒު ކުރާނެ އިރަކާ ގުޅޭގޮތުން ސުވާލު ކޮށްފަ އެވެ.
އެ ސުވާލަށް ޖަވާބު ދެއްވަމުން މިނިސްޓަރު ޝިޔާމް ވިދާޅުވީ 48 ގަޑިއިރު ތެރޭ މަސްވެރިންނަށް ފައިސާ ދިނުމަކީ މިސަރުކާރުގެ ވައުދެއް ކަމަށާއި، އެ ވައުދަށް ނުފިލާނެ ކަމަށެވެ.
"އެއީ އަޅުގަނޑުމެން ފިލާނެ ވައުދެއް ނޫން. އެއީ ރައީސް ޑރ. މުހައްމަދު މުއިއްޒު އިރާދަކުރެއްވިއްޔާ ތަންފީޒު ކުރައްވާނެ ވައުދެއް." މިނިސްޓަރު ޝިޔާމް ވިދާޅުވި އެވެ.
ކުރީ ސަރުކާރަށް ފާޑުވިދާޅުވެ ޝިޔާމް ވިދާޅުވީ މި ސަރުކާރަށް މަސްވެރިން ފެނުނީ ރިޔާސީ އިންތިހާބުގެ ފުރަތަމަ ބުރާ ދެވަނަ ބުރާ ދޭތެރޭގައި ނޫން ކަމަށެވެ. މިދިޔަ ސަރުކާރުގައި މަހުގެ އަގު އުފުލީ އިންތިހާބު ކާމިޔާބު ނުވާނެކަން އެނގޭތީ ކަމަށާއި، ރައީސް ޑރ. މުހައްމަދު މުއިއްޒު ސަރުކާރާ ހަވާލުވެވަޑައިގެންނެވިއިރު މަސްވެރިންނަށް 250 މިލިއަން ދައްކަން އޮތް ކަމަށެވެ.
މަސްވެރިންނަށް ނުދެއްކި ހުރި ފައިސާ މިސަރުކާރުން ދައްކާފައިވާ ކަމަށާއި މަސްވެރިންނަށް ބަރާބަރަށް މިހާރު ފައިސާ ދެވެމުންދާ ކަމަށް މިނިސްޓަރު ޝިޔާމް ވިދާޅުވި އެވެ. މަސްވެރިންގެ އަތުން މަސް ގަންނަ އަގު ދުނިޔޭގެ ބާޒާރާ ގުޅިގެން ކަނޑައެޅޭ އަގަކަށް ވާންޖެހޭކަން ފާހަގަކޮށް މިނިސްޓަރު ޝިޔާމް ވިދާޅުވީ މީގެކުރިން މިފްކޯއަށް މަސްގަތުމަށް ސަބްސިޑީގެ ގޮތުގައި ބޮޑު އަދަދުތަކެއް ދީފައި އޮތުމުން ސިނާއަތުގެ ތަރައްގީއަށް އެއްވެސް ކަމެއް ނުކުރެވި އޮތް ކަމަށެވެ.