ގުޅީފަޅުން ގޯތި ލިބުން ފަރާތްތަކަށް ސަރުކާރުން ހަމަޖައްސައިދޭ އައު ޕްލޮޓްތަކުގެ ގުރު ނެގުމަށް ސަރުކާރުގެ އޮފިޝަލުން ހަމަޖައްސާފައިވާ މައްސަލައާއި ގޯއްޗާއި ފްލެޓްގެ ހައްގުވެރިންނަށް އެތަންތަން ހަވާލުކުރުން ލަސްވާ މައްސަލައިގައި ކަންބޮޑުވުން ފާޅުކޮށް ރައްޔިތުންގެ މަޖިލީހަށް ހުށަހެޅި ކުއްލި މައްސަލަ ބަލައިނުގަނެ ބޭރުކޮށްލައިފި އެވެ.
ރައްޔިތުންގެ މަޖިލީހުގެ މިއަދުގެ ޖަލްސާއަށް މި ކުއްލި މައްސަލަ ހުށަހެޅުއްވީ ގަލޮޅު ދެކުނު ދާއިރާގެ މެންބަރު މީކާއީލް އަހްމަދު ނަސީމް އެވެ. މި ކުއްލި މައްސަލަ ބަލައިނުގަނެ މަޖިލީހުން ބޭރުކޮށްލާފައިވަނީ 46 މެންބަރުންގެ ވޯޓުންނެވެ. މި ކުއްލި މައްސަލަ ބަލައިގަތުމަށް ފެންނަ ކަމަށް ވޯޓު ދީފައިވަނީ 10 މެންބަރުންނެވެ.
މީކާއިލް ހުށަހެޅުއްވި ކުއްލި މައްސަލައިގައި ބުނެފައިވަނީ، ބިންވެރިޔާ ސްކީމްގެ ދަށުން ގުޅީފަޅުން ގޯތި ލިބުނު ފަރާތްތަކަށް އައު ޕްލޮޓްތައް އެކަށައެޅުމަށްޓަކައި ބޭއްވޭ ގުރުއަތު ނެގުން އިއްޔެ ފެށިއިރު މިކަން ކުރިއަށް ގެންގޮސްފައިވަނީ ގޯތީގެ ހައްގުވެރިންނަށް ދުރާލާ އެންގުމަކާ ނުލައި ކަމަށެވެ.
ކުއްލި މައްސަލައިގައި ބުނެފައިވަނީ ގޯތީގެ ހައްގުވެރިންނަށް ގުރުނެގުމުގައި ބައިވެރިނުވެވޭ ގޮތަށް ސީދާ މިނިސްޓްރީގެ އޮފިޝަލުން ގުރުނަގާގޮތަށް ހަމަޖެއްސުމަކީ، ކޮރަޕްޝަނަށް މަގުފަހިވެ، ގޯތީގެ ހައްގުވެރިންގެ މުދަލަކަށް ނުހައްގުން އަރައިގަތުމުގެ ފުރުސަތު ހުޅުވިގެންދާ ގޮތަށް ކުރަމުންދާ ކަމެއް ކަމަށެވެ. އަދި އެއްވެސް ހާމަކަމެއް ނެތް ގޮތަށް އަދި ރައްޔިތުންގެ މެދުގައި ނުތަނަވަސްކަމާއި، ޝައްކު އުފެދިގެންދާ ގޮތަށް މިކަން ކުރިއަށްގެންދަމުންދާ ދިއުމަކީ އެތައް ހާސް ރައްޔިތުންގެ ބޯހިޔާވަހިކަމުގެ ހައްގަށް އުނިކަން އަންނާނެ ކަމެއްކަމަށާއި ގުރުނެގުމުގެ ކަންކަން ކުރިއަށް ގެންގޮސްފައިވާގޮތާމެދު ރައްޔިތުންގެ ތެރެއިން ގިނަ ބަޔެއްގެ މެދުގައި ކަންބޮޑުވުން އުފެދި މިކަމާ ނުރުހުންފާޅު ކޮށްފައިވާ ކަމަށެވެ.
މީގެއިތުުން މިއަދާ ހަމައަށްވެސް ފްލެޓް ލިސްޓް އާންމުކޮށްފައި ނުވަނީ، އެ ލިސްޓް ގަޑުބަޑުކޮށް އޭގެ ސައްހަކަން ނަގާލުމުގެ ނިޔަތުގައިކަމަށްވެސް ތުހުމަތުކޮށްފައިވެ އެވެ. އެހެންކަމުން މިމައްސަލަތައް ހައްލު ކުރުމަށް ސަރުކާރަށް ގޮވާލާފައިވެ އެވެ.