ށ. ކަނޑިތީމުގައި ސަޕްލައި ފެނުގެ ހިދުމަތް ދޭން ފަށައިފި އެވެ.
ކޮންސްޓްރަކްޝް މިނިސްޓްރީން ބުނީ ފެނުގެ ހިދުމަތް ދޭން ފެށި އިރު، ފެނާއި ނަރުދަމާ މަޝްރޫޢުގެ މުހިންމު ގިނަ މަސައްކަތްތަކެއް މިހާރު އޮތީ ނިމިފައި ކަމަށެވެ.
އެގޮތުން ކަނޑިތީމުގައި ގާއިމުކުރި ނިޒާމު ވަނީ އޮޕަރޭޓަރާ ހަވާލުކޮށް، ރަސްމީކޮށް ރައްޔިތުންނަށް މިހާރު ހިދުމަތް ދެމުން އަންނަ ކަމަށް މިނިސްޓްރީން ބުންޏެވެ. މަޝްރޫޢުގެ ދަށުން އެ ރަށުގައި ޤާއިމުކުރި ފެނުގެ ވަސީލަތްތަކުގެ ތެރޭގައި 55 ޓަނުގެ 2 އާރްއޯ ޕްލާންޓާއި، 60 ޓަނުގެ ވާރޭ ފެން ޕްލާންޓެއް ހިމެނެ އެވެ. މީގެ އިތުރުން، 361 ޓަނުގެ ބޯފެން ރައްކާކުރާ ދެ ޓޭންކާއި، 900 ޓަނުގެ ވާރޭ ފެން ރައްކާކުރާ ޓޭންކެއް ވެސް ވަނީ ބަހައްޓައިފަ އެވެ.
މަޝްރޫޢުގެ މިހާރު ކުރިއަ ށްދަނީ ޑިފެކްޓްސް ލައަބިލިޓީ މުއްދަތުގެ މަސައްކަތްތަކެވެ. އެ މުއްދަތުގައި، މަޝްރޫޢުގެ ތެރެއިން ފާހަގަކުރެވޭ ކުދިކުދި މައްސަލަތައް ހައްލުކުރުމުގެ މަސައްކަތްތައް އަންނަނީ ކުރެވެމުންނެވެ.
ކަނޑިތީމުގެ ފެނާއި ނަރުދަމާ މަޝްރޫޢު ފުރިހަމަވުމުން، ރަށުގެ ރައްޔިތުންނަށް ރައްކާތެރި ބޯފެނާއި ނަރުދަމާގެ ޚިދުމަތް ލިބި، ދިރިއުޅުމުގެ ފެންވަރު ރަނގަޅު ވެގެން ދާނެ ކަމަށް ކޮންސްޓްރަކްޝަން މިނިސްޓްރީން ބުންޏެވެ.