މި މަހުގެ ކުރީކޮޅު ރިލީޒްކުރި ބޮލީވުޑްގެ ފިލްމު "ޖިގްރާ" ގެ ޒުވާން އެކްޓަރު ވެދާންގް ރައިނާ ރާއްޖޭގެ ޗުއްޓީ ދަތުރުގެ ފޮޓޯތަކެއް އިންސްޓަގްރާމުން ދައްކާލައިފި އެވެ.
ޗުއްޓީ ހޭދަކުރަނީ ކޮން ރިސޯޓެއްގައިކަން ނޭނގޭ ގޮތަށް އޭނަ އާންމުކުރި ފޮޓޯތަކުގެ ކެޕްޝަނަކަށް ލިޔެފައި އިނީ "އައި ފައުންޑް ޑޯރީ" އެވެ.
ވެދާންގް ރާއްޖޭގައި ޗުއްޓީ ހޭދަކުރަމުން އަންނަ އިރު، އޭނަ ރައްޓެހިވެގެން އުޅޭ ކަމަށް އަޑު އަރާފައިވާ ބަތަލާ ހުޝީ ކަޕޫރް ވެސް މި ވަގުތު ހުރީ ރާއްޖޭގަ އެވެ. އޭނަ އާއި ދައްތަ ބަތަލާ ޖާންވީ ކަޕޫރްގެ އިންސްޓަގްރާމްގައި ވެސް ދަތުރާ ގުޅޭ ޕޯސްޓްތަކެއް ހިއްސާކޮށްފައިވެ އެވެ.
ބެލެވޭ ގޮތުން ވެދާންގް ވެސް ހުރީ އެ ދެބެއިންނާ އެކީ އެއް ރިސޯޓެއްގަ އެވެ. ހުޝީ އާއި ޖާންވީ އަކީ ކުރީގެ މަޝްހޫރު ބަތަލާ ސްރީދޭވީގެ ދެ ދަރިންނެވެ. އެ މީހުން މީގެ ކުރިން ވެސް އެކި ފަހަރު މަތިން ރާއްޖެ އަށް ޒިޔާރަތްކޮށްފައިވެ އެވެ.
ވެދާންގް އާއި ހުޝީގެ ފިލްމީ ދަތުރުގެ ފެށުމަކީ މިދިޔަ އަހަރު ނެޓްފްލިކްސް އިން ގެނެސްދިން "ދި އާޗީސް" އެވެ. އެ ފިލްމަކީ ޝާހްރުކް ޚާންގެ ދަރިފުޅު ސުހާނާ ޚާނާއި އަމީތާބް ބައްޗަންގެ ކާފަދަރި، އަގަސްޓިއާ ނަންދާ ވެސް ތައާރަފުވި ފިލްމެވެ.
މި މަހުގެ 11 ގައި ރިލީޒްކުރި ވެދާންގްގެ ދެވަނަ ފިލްމު "ޖިގްރާ" އަކީ އޭނަ އާއި އާލިއާ ބަޓް ދެބެއިންގެ ރޯލު ކުޅުނު އެކްޝަން ތުރިލާއެކެވެ. މި ފިލްމަކީ ބެލުންތެރިންގެ ވަރަށް ފިނި ތަރުހީބެއް ލިބުނު ފިލްމެކެވެ. "ޖިގްރާ" ގައި އެކްޓްކުރުމުގެ އިތުރުން އެ ފިލްމުގެ ލަވަތަކެއް ވެސް އަރަމުން އަންނަ އުންމީދީ އެކްޓަރު ކިޔާފައިވެ އެވެ.
ހުޝީގެ ކުރިއަށް ހުރި ފިލްމުތަކުގެ ތެރޭގައި ސައިފް އަލީ ޙާންގެ ދަރިފުޅު އިބްރާހީމް އަލީ ޚާނާ އެކީ ކުޅެފައިވާ "ނާދާނިޔާން" އާއި އާމިރު ޚާންގެ ދަރިފުޅު ޖުނައިދު ޚާނާ އެކީ ކުޅެފައިވާ އަދި ނަން އިއުލާން ނުކުރާ ފިލްމެއް ހިމެނެ އެވެ. އެ ދެ ފިލްމު ވެސް އަންނަ އަހަރު ބެލުންތެރިންނަށް ގެނެސްދޭނެ އެވެ.