ދިވެހިރާއްޖެއިން އިންޑިއާ އަދި ސައުދީ އަރަބިއްޔާއަށް ކަނޑައަޅުއްވާ ސަފީރުން އައްޔަނު ކުރައްވައިފި އެވެ.
އިންޑިއާއަށް ދިވެހިރާއްޖެއިން ކަނޑައަޅުއްވާފައި ހުންނަވާ ސަަފީރުކަމަށް، އައްޔަން ކުރެއްވީ އާއިޝަތު އަޒީމާއެވެ. އަދި ސައުދިއަރަބިއްޔާއަށް ދިވެހިރާއްޖެއިން ކަނޑައަޅުއްވާފައި ހުންނަވާ ސަފީރުކަމަށް އައްޔަން ކުރެއްވީ އަހުމަދު ސަރީރެވެ.
މި ދެބޭފުޅުން މަގާމަށް އައްޔަނު ކުރައްވާފައިވަނީ މިއަދު ރައީސުލްޖުމްހުރިއްޔާގެ އޮފީހުގައި ކުރިއަށް ގެންދިޔަ ރަސްމިއްޔާތުގަ އެވެ.
އިންޑިއާ ސަރުކާރު ކަމަށް އައްޔަނު ކުރެއްވި އަޒީމާ އަކީ ރާއްޖެ އިން ޗައިނާ އަށް ކަނޑައަޅުއްވާފައި ހުންނަވާ ސަފީރުގެ މަގާމާއި އިނގިރޭސިވިލާތުގެ ލަންޑަންގައި ހުންނަ ދިވެހި އެމްބަސީގެ ޑެޕިއުޓީ އެމްބެސެޑަރުގެ މަގާމު ވެސް ކުރިން އަދާ ކުރެއްވި ބޭފުޅެކެވެ. މީގެ އިތުރުން ފޮރިން މިނިސްޓްރީގެ އެޑިޝަނަލް ސެކްރެޓަރީގެ މަގާމާއި ޖޮއިންޓް ސެކްރެޓަރީގެ މަގާމު ވެސް އޭނަ އަދާކުރެއްވި އެވެ.
ސައުދީއަށް ކަނޑައެޅުއްވި ސަރީރު މި ވަގުތު ހުންނެވީ ފޮރިން މިނިސްޓްރީގެ އެމްބެސެޑަރ އެޓް ލާޖުގެ މަގާމުގަ އެވެ. އޭގެ ކުރިން އޭނަ އޮގަނައިޒޭޝަން އިފް އިސްލާމިކް ކޮންފަރެންސް އޯއައިސީ) ގެ ޑިރެކްޓަ އޮފް އޭޝިއަން އެފެއާޒްގެ މަގާމު ވެސް ފުރިއްވި އެވެ. ސަރީރަކީ 1986 ވަނަ އަހަރުން ފެށިގެން ފޮރިން މިނިސްޓްރީގެ އެކި މަގާމުތަކުގަޔާއި، ރާއްޖޭގެ ޑިޕްލޮމެޓިކް މިޝަންތަކުގެ އެކި ފެންވަރުގެ މަޤާމުތަކުގައި އަގުހުރި ޚިދުމަތްތަކެއް ކުރައްވަމުންގެންދަވާ ބޭފުޅެކެވެ. އެގޮތުން ފޮރިން މިނިސްޓްރީގެ ފޮރިން ސެކްރެޓަރީގެ މަގާމާއި، އދ. އަށް ރާއްޖެއިން ކަނޑައަޅުއްވާފައި ހުންނަވާ ޕާމަނަންޓް ރެޕްރެޒެންޓެޓިވްގެ މަގާމާއި، އެމެރިކާ އަށް ރާއްޖެއިން ކަނޑައެޅުއްވި ސަފީރުގެ މަގާމު ވެސް ފުރުއްވާފައިވެ އެވެ. އަދި ބަންގްލަދޭޝްގެ ސަފީރުކަމާއި އދ. ގައި ހުންނަވާ ރާއްޖޭގެ ދާއިމީ މަންދޫބުކަމުގެ މަގާމު ވެސް ސަރީރު ފުރުއްވި އެވެ.