ރައީސް ޑރ. މުހައްމަދު މުއިއްޒުގެ ވެރިކަމުގެ ދައުރު ނިމުމުގެ ކުރިން މަސް ސްޓޯރޭޖް 25،000 ޓަނަށް އިތުރު ކުރައްވާނެ ކަމަށް ފިޝަރީޒް މިނިސްޓަރު އަހުމަދު ޝިޔާމް ވިދާޅުވެއްޖެ އެވެ.
ރައްޔިތުންގެ މަޖިލީހުގެ މިއަދުގެ ޖަލްސާގައި މިނިސްޓަރު ޝިޔާމަށް ސުވާލު ކުރުމަށް ލިބުނު ފުރުސަތުގައި އެމްޑީޕީގެ ޕީޖީ ލީޑަރު އިބްރާހީމް ނާޒިލް ވަނީ މިސަރުކާރު ހަވާލުވިއިރު މަސްވެރިންނަށް ފައިސާ ދައްކަން ޖެހުނީ ސްޓޯރޭޖްގައި މަސް ނެތިތޯ ސުވާލު ކޮށްފަ އެވެ.
"250 މިލިއަން ރުފިޔާގެ މަސް ކިހިނެއްތޯ ސްޓޯކުރާނީ؟ ސްޓޯރޭޖް ނެތް ވާހަކަ މި ދައްކަނީ." އެސުވާލަށް ޖަވާބު ދެއްވަމުން މިނިސްޓަރު ޝިޔާމް ވިދާޅުވި އެވެ.
މީގެއިތުރުން ޝިޔާމް ވިދާޅުވީ، މިވަގުތު ރާއްޖޭގައި މަސް ސްޓޯކުރުމުގެ ކެޕޭސިޓީއަކީ 8،500 ޓަނު ކަމަށެވެ. އަދި މިސަރުކާރު ނިމެންވާއިރަށް 25،000 ޓަނަށްވުރެ މަތީގައި މަސް ސްޓޯރޭޖް ހުންނާނެ ކަމަށްވެސް ވިދާޅުވި އެވެ.
ކުރީ ސަރުކާރަށް ފާޑުވިދާޅުވެ ޝިޔާމް ވިދާޅުވީ މި ސަރުކާރަށް މަސްވެރިން ފެނުނީ ރިޔާސީ އިންތިހާބުގެ ފުރަތަމަ ބުރާ ދެވަނަ ބުރާ ދޭތެރޭގައި ނޫން ކަމަށެވެ. މިދިޔަ ސަރުކާރުގައި މަހުގެ އަގު އުފުލީ އިންތިހާބު ކާމިޔާބު ނުވާނެކަން އެނގޭތީ ކަމަށާއި، ރައީސް ޑރ. މުހައްމަދު މުއިއްޒު ސަރުކާރާ ހަވާލުވެވަޑައިގެންނެވިއިރު މަސްވެރިންނަށް 250 މިލިއަން ދައްކަން އޮތް ކަމަށެވެ.
މަސްވެރިންނަށް ނުދެއްކި ހުރި ފައިސާ މިސަރުކާރުން ދައްކާފައިވާ ކަމަށާއި މަސްވެރިންނަށް ބަރާބަރަށް މިހާރު ފައިސާ ދެވެމުންދާ ކަމަށް މިނިސްޓަރު ޝިޔާމް ވިދާޅުވި އެވެ. މަސްވެރިންގެ އަތުން މަސް ގަންނަ އަގު ދުނިޔޭގެ ބާޒާރާ ގުޅިގެން ކަނޑައެޅޭ އަގަކަށް ވާންޖެހޭކަން ފާހަގަކޮށް މިނިސްޓަރު ޝިޔާމް ވިދާޅުވީ މީގެކުރިން މިފްކޯއަށް މަސްގަތުމަށް ސަބްސިޑީގެ ގޮތުގައި ބޮޑު އަދަދުތަކެއް ދީފައި އޮތުމުން ސިނާއަތުގެ ތަރައްގީއަށް އެއްވެސް ކަމެއް ނުކުރެވި އޮތް ކަމަށެވެ.