މިހާރު މަސްވެރިންނަށް ނުދެވިހުރި ފައިސާ ދިނުމަށް މިފްކޯއާ ފައިސާ ހަވާލުކޮށްފައިވާ ކަމަށް ރައީސް ޑރ. މުހައްމަދު މުއިއްޒު ވިދާޅުވެއްޖެ އެވެ.
ރައީސް މިއަދު އެކަން ހިއްސާކުރެއްވީ ސޯޝަލް މީޑިއާ ޕޯސްޓެއްގަ އެވެ.
"މިއަދާ ހަމައަށް މަސްވެރިންނަށް ނުދެވި ހުރި ފައިސާގެ ޖުމުލަ އަދަދު މިހާރު ވަނީ އެ ފަރާތްތަކަށް ރަށްދު ކުރުމަށް މިފްކޯއަށް ޙަވާލުކުރެވިފައި،" ރައީސް ވިދާޅުވި އެވެ. "މެނިފެސްޓޯގައިވާ ފަދައިން 48 ގަޑިއިރު ތެރޭގައި ދެމެހެއްޓެނިވި ގޮތެއްގައި ފައިސާ ދެވޭނޭ ނިޒާމު ޤާއިމު ކުރުމުގެ މަސައްކަތް ދަނީ ކުރެވެމުން."
މި ސަރުކާރު އައި ފަހުން އެކި ފަހަރު މަތިން މަސްވެރިންނަށް ފައިސާ ދޫކޮށްފައިވެ އެވެ. ނަމަވެސް ފައިސާ ދިނުން ލަސްވެެން މި އަހަރުގެ މެދުތެރޭގައި ރާއްޖޭގެ ބައެއް ހިސާބުތަކުގައި މަސްވެރިން މުޒާހަރާކޮށްފައިވެ އެވެ.
ސަރުކާރުން ބުނެފައި ވަނީ އަމާޒަކީ ކިރުވާ މަހަށް އެންމެ ލަސްވެގެން ވެސް ދެ ދުވަހުގެ ތެރޭގައި ފައިސާ ލިބޭނެ އިންތިޒާމު ހަމަޖައްސައި މަސްވެރިންނަށް ދިމާވާ މައްސަލަތައް ހައްލުކޮށް ދިނުން ކަމަށެވެ.
މި ސަރުކާރުން މަސްވެރިންނަށް މިހާތަނަށް 1.1 ބިލިއަނަށް ވުރެ ގިނަ ރުފިޔާ ދޫކޮށްފައިވެ އެވެ.
ރައްޔިތުންގެ މަޖިލީހުގައި މިއަދުގެ ޖަލްސާގައި ފިޝަރީޒް މިނިސްޓަރު އަހުމަދު ޝިޔާމު ވިދާޅުވީ މަސްވެރިންނަށް ނުދެވި މިހާރު ހުރީ އޮތީ 16 މިލިއަން ރުފިޔާ ކަމަށެވެ.