"އިންޑިއާ އައުޓް" ހަރަކާތަކީ ގައުމީ ސަލާމަތަށް ހުރި ނުރައްކަލެއް ކަމަށް ކަނޑައަޅައި ކުރީ ސަރުކާރުން ނެރުނު ގަރާރު ބާތިލުކޮށްދޭން އެދި ސިވިލް ކޯޓަށް ހުށަހެޅި މައްސަލަ އެ ކޯޓުން ބޭރުކޮށްލައިފި އެވެ.
ސިވިލް ކޯޓުން އެ މައްސަލަ ބާތިލުކުރި ހުކުމުގައި ބުނީ، އެ މައްސަލައިގައި ކުރީގެ ރައީސް ޔާމީންގެ ފަރާތުން ކޯޓަށް ހާޒިރުވުމަށް ވަކީލަކު ހަމަޖައްސަވާފައިވާ ކަމަށާއި، ކޯޓަށް ހާޒިރުވުމަށް އެ ވަކީލަށް އަމުރު ފޮނުވުމުން، އަމުރާ ހަވާލުވުމަށް ފަހު ކޯޓަށް ހާޒިރުވެފައި ނުވާކަމަށެވެ. އެހެންވެ، މަގްބޫލު އުޒުރެއް ނެތި ކޯޓަށް ހާޒިރު ވެފައި ނުވާތީ އެ މައްސަލާގެ ދައުވާ ފޯމް ބާތިލްކުރީ ކަމަށް އެ ނިންމުމުގައިވެ އެވެ.
އޭރު އިދިކޮޅުގައި ތިބި ޕީޕީއެމާއި ޕީއެންސީން ކުރިއަށް ގެންދިޔަ އިންޑިއާ އައުޓް ކެމްޕޭނަކީ ރާއްޖޭގައި ތިބި އިންޑިއާ އިން ސިފައިން ބާލަން ގޮވާލައި ކުރިއަށް ގެންދިޔަ ކެމްޕޭނެކެވެ. މީގައި އެންމެ އިސްކޮށް ހުންނެވީ ކުރީގެ ރައީސް އަބްދުﷲ ޔާމީނެވެ.
"އިންޑިއާ އައުޓް" ކެމްޕޭން ހުއްޓުވަން ކުރީ ސަރުކާރުން ގަރާރެއް ނެރުނީ "އިންޑިއާ އައުޓް" ލިޔެފައިވާ ބޮޑެތި ބެނާތައް މާލޭގައި ދަމަން ފެށުމާ ގުޅިގެންނެވެ. އެގޮތުން އެންމެ ފުރަތަމަ ނެގި އެފަދަ ބެނާ އަކީ ޔާމީންގެ ގޭގައި ދެމި ބެނާ އެވެ.