ރިޔާސީ ދައުރު ފަށާ ދުވަހަކީ ނޮވެމްބަރު 11 ކަމަށް ކަނޑައަޅަން ގާނޫނުއަސާސީއަށް އިސްލާހު ހުށަހަޅަން ނިންމާފައިވާ ކަމަށް އެޓާނީ ޖެނެރަލް އަހުމަދު އުޝާމް ވިދާޅުވެއްޖެ އެވެ.
ރައީސް އޮފީހުގައި މިއަދު ބޭއްވި ނޫސްވެރިންގެ ބައްދަލުވުމުގައި އުޝާމް ވަނީ ސަރުކާރުގެ ފަރާތުން ގާނޫނަށް ގެންނަން ބޭނުންވާ ބައެއް އިސްލާހުތައް ހާމަކުރައްވައިފަ އެވެ.
އޭގެތެރޭގައި ރިޔާސީ ދައުރު ފެށޭ ދުވަހަކީ ނޮވެމްބަރު 11 ކަމަށް ކަނޑައެޅުމަށްޓަކާ ގާނޫނުއަސާސީއަށް ހުށަހަޅާ އިސްލާހު ހިމެނެ އެވެ.
"މި ދެންނެވި އިސްލާހަކީ އެ އިސްލާހު ގެނައުމަށްޓަކާ ޕަބްލިކް ރިޕެރެންޑަމްއަކަށް ދާންޖެހޭ ކަހަލަ އިސްލާހެއް ކަމަށްވާތީ މި ކަހަލަ އިސްލާހުތައް އަޅުގަނޑުމެންނަށް ކުޑަކުޑަ ވަގުތުކޮޅެއް ނަގައިގެން އެކަން ކޮށްލެވޭނީ،" އުޝާމް ވިދާޅުވި އެވެ.
ރިޔާސީ ދައުރު ފެށޭ ދުވަސް ބަދަލުވީ 2013 ވަނަ އަހަރު ބޭއްވި ރިޔާސީ އިންތިހާބުގެ ފުރަތަމަ ބުރު ސުޕްރީމް ކޯޓުން ބާތިލުކުރުމުން އެ އަހަރުގެ ނޮވެމްބަރު 11 އަށް އާ ރައީސަކު އިންތިހާބު ނުކުރެވުމުގެ ސަބަބުންނެވެ. އެގޮތުން ކުރީގެ ރައީސް އަބްދުﷲ ޔާމީން އަބްދުލްގައްޔޫމް ހުވާކުރެއްވީ އެ އަހަރުގެ ނޮވެމްބަރު 17 ގައެވެ. އެ ފަހުން ވެރިކަމުގެ ދައުރު ގުނަމުން އަންނަނީ ނޮވެމްބަރު 17 އިން ފެށިގެންނެވެ.
ސަރުކާރުގެ ފަރާތުން ގާނޫނު އަސާސީ އިސްލާހުކުރަން ހުށަހަޅާ އިތުރު ބިލުތަކުގެ ތެރޭގައި އެސެޓް ރިކަވަރީ ބިލަކާއި ރާއްޖޭގެ ސަރަހައްދު ކަނޑައަޅައި، އެ ސަރަހައްދެއް ބަދަލެއް އަންނަމަ އަމަލުކުރާނެ ގޮތުގެ ބިލަކާއި މަޖިލިސް މެންބަރުންގެ ރީކޯލް ވޯޓާބެހޭ އިސްލާހެއްގެ އިތުރުން ވެރިކަމުގެ ނިޒާމާ ގުޅޭ ބިލުތައް ހިމެނެ އެވެ.
އުޝާމް ވަނީ ގާނޫނު އަސާސީ އަށް ގެންނަ ބަދަލުތައް ގެންނާނީ ތިން ފިޔަވައްސަކަށް ބަހާލައިގެން ކަމަށް ވިދާޅުވެފަ އެވެ.