ލީގު ކަޕުން ޗެލްސީ އާއި ސިޓީ ކަޓައިފި

އިނގިރޭސި ލީގު ކަޕުން ޗެލްސީ އާއި މެންޗެސްޓާ ސިޓީ ކަޓައިފި އެވެ.

މި މުބާރާތުގެ ހަތަރުވަނަ ބުރުން ސިޓީ ކެޓީ ރޭ ރަށުން ބޭރުގައި ޓޮޓެންހަމްއާ ބައްދަލުކޮށް 2-1 އިން ބަލިވުމުންނެވެ.

މި މެޗުގެ ފުރަތަމަ 30 މިނެޓްތެރޭ ޓޮޓެންހަމުން ވަނީ ދެ ގޯލުގެ ލީޑެއް ނަގާފަ އެވެ. ޓޮޓެންހަމްގެ ފުރަތަމަ ގޯލު މެޗުގެ ފަސްވަނަ މިނެޓްގައި ޓިމޯ ވާނާ ކާމިޔާބުކޮށްދިން އިރު އެޓީމުގެ ދެވަނަ ގޯލު މެޗުގެ 25 ވަނަ މިނެޓްގައި ކާމިޔާބުކޮށްދިނީ ޕަޕޭ ސާ އެވެ. ފުރަތަމަ ހާފް ނިމުމުގެ ކުރިން މެތިއުސް ނުނޭސް ވަނީ ސިޓީގެ ހަމައެކަނި ގޯލު ކާމިޔާބުކޮށްދީފަ އެވެ.

މި މެޗުގެ ފަހު ވަގުތުކޮޅުތެރޭ ނަތީޖާ އެއްވަރުކޮށްދޭން ސިޓީގެ ޒުވާން މިޑްފީލްޑަރު ނިކޯ އޮރެއިލީ އަށް ރަނގަޅު ފުރުސަތެއް ލިބުނު ނަމަވެސް އޭނާ ބޮލުން ފޮނުވާލި ހަމަލާ ގޯލުގެ ހުރަސް ރޮގުމަތިން ދިފާއުކުރީ ޓޮޓެންހަމްގެ މިޑްފީލްޑަރު ބިސޫމާ އެވެ.

ޗެލްސީ މުބާރާތުން ކެޓީ ނިއުކާސަލް ޔުނައިޓެޑާއި ބައްދަލުކުރި މެޗުން 2-0 އިން ބަލިވުމާ ގުޅިގެންނެވެ. މި މެޗުގައި ނިއުކާސަލްގެ ފުރަތަމަ ގޯލު މެޗުގެ 23 ވަނަ މިނެޓްގައި އެލްގްސެންޑާ އިސާކް ކާމިޔާބުކޮށްދިން އިރު، ނިއުކާސަލްގެ ދެވަނަ ގޯލަކީ އޭގެ ތިން މިނެޓް ފަހުން ޗެލްސީގެ ޑިފެންޑަރު އެކްސެލް ޑިސާސީ އަތުން ބައިކޮޅަށް ވަތް ގޯލެކެވެ.

މެޗުގެ ދެވަނަ ހާފުގައި ޗެލްސީ އަށް ގޯލު ޖަހާނެ ރަނގަޅު ފުރުސަތުތަކެއް ލިބުނު ނަމަވެސް އޭގެ ބޭނުން އެޓީމަށް އެންމެ ރަނގަޅަށް ހިފޭގޮތް ވަނީ ނުވެފަ އެވެ.

ލީގު ކަޕްގެ ހަތަރުވަނަ ބުރުގައި ރޭ ކުޅުނު އެހެން މެޗުތަކަށް ބަލާއިރު، މެންޗެސްޓާ ޔުނައިޓެޑް ވަނީ 5-2 އިން ލެސްޓާ ސިޓީ ބަލިކޮށްފަ އެވެ. ލިވަޕޫލުން 3-2 އިން ބްރައިޓަން ބަލިކުރިއިރު، އާސެނަލުން ވަނީ 3-0 އިން ޕްރެސްޓަންގެ މައްޗަށް ކުރި ހޯދާފަ އެވެ. އަދި ކްރިސްޓަލް ޕެލެސް އަތުން 2-1 އިން ބަލިވެ އެސްޓަންވިލާ ވަނީ މުބާރާތުން ކަޓާފަ އެވެ.