އަންގާރަ ދުވަހު ބޯކޮށް ވާރޭ ވެހި ސްޕެއިންގެ އެކި ހިސާބުތަކުގައި ފެންބޮޑުވެ، ބޮޑެތި ގެއްލުންތަކެއްވެއްޖެ އެވެ.
މީޑިއާތަކުން ރިޕޯޓްކޮށްފައިވާ ގޮތުގައި ހުއްޓުމެއް ނެތި އަށް ގަޑިއިރު ބޯކޮށް ވާރޭ ވެހުމުގެ ސަބަބުން އެންމެ ބޮޑަށް ފެންބޮޑުވި ސިޓީތަކުގެ ތެރޭގައި ވެލެންސިއާ ހިމެނޭ އިރު، އެތަނުން މިހާތަނަށް 95 މީހަކު މަރުވެ، އެތައް ބަޔަކު ވަނީ ގެއްލިފަ އެވެ. ސަރުކާރުގެ އޮފިޝަލުން ވިދާޅުވީ މަރުވި މީހުންގެ އަދަދު އަދިވެސް އިތުރުވުމުގެ ފުރުސަތު ބޮޑު ކަމަށާއި ގެއްލުނު މީހުން ހޯދުމުގެ މަސައްކަތްތައް ކަމާބެހޭ އިދާރާތަކުން ކުރަމުން އަންނަ ކަމަށެވެ.
ބޯކޮށް ވާރޭ ވެހި ފެންބޮޑުވުމުގެ ސަބަބުން އިމާރާތްތަކެއް ވެސް ވެއްޓިފައިވާ އިރު، ބައެއް ބްރިޖްތައް ވެސް ހަލާކުވެފައިވެ އެވެ.
މި ހާދިސާއާ ގުޅިގެން ސްޕެއިންގެ ބޮޑުވަޒީރު ޕެޑްރޯ ސަންޗޭޒް ވަނީ ތިން ދުވަހަށް ގައުމީ ހިތާމަ ވެސް އިއުލާން ކުރައްވައިފަ އެވެ.
އެ ގައުމުގެ ސަރުކާރުން ބުނެފައިވާ ގޮތުގައި މިއީ 1973 ގެ ފަހުން ސްޕެއިނަށް ކުރިމަތިވި ފެން ބޮޑުވުމުގެ އެންމެ ނުރައްކާތެރި ހާދިސާ އެވެ. އެ އަހަރު ފެންބޮޑުވި ހާދިސާގައި 150 އެއްހާ މީހުން މަރުވި އެވެ.