ބޮލީވުޑްގެ އެކްޓަރު ވަރޫން ދަވަންގެ ދަރިފުޅުގެ ނަމަކީ ލާރާ ކަމަށް ބުނެފި އެވެ.
ވަރޫން އާއި އަންހެނުން ނަތާޝާ ދަލާލުގެ އަލަތު ދަރިފުޅު އުފަންވީ މިދިޔަ ޖޫން މަހުގެ 4 ގަ އެވެ. ދަރިފުޅު އުފަންވިތާ ފަސް ވަރަކަށް މަސް ފަހުން ކުއްޖާގެ ނަން ހިއްސާކުރި ނަމަވެސް މިހާތަނަށް ދަރިފުޅުގެ މޫނު ފެންނަ ފޮޓޯއެއް އާންމުކޮށްފައެއް ނުވެ އެވެ.
ދަރިފުޅުގެ ނަން ހާމަނުކުރީ އަމީތާބް ބައްޗަން ސޮނީ ޓީވީ އަށް ހޯސްޓްކޮށް ދެމުން އަންނަ "ކޯން ބަނޭގާ ކަރޯޑްޕަތީ" ގެ ރޭގެ އެޕިސޯޑްގަ އެވެ. ޝޯގައި ވަރޫން ބައިވެރިވީ އަންނަ މަހުގެ 7 ގައި އެމެޒޯން ޕްރައިމް ވީޑިއޯ އިން ޕްރީމިއާ ކުރަން ހަމަޖެހިފައިވާ އޭނަގެ އަލަތު ވެބް ސީރީޒް "ސިޓަޑެލް: ހަނީ ބަނީ" ގެ ޕްރޮމޯޝަނަށް އޭގެ ޑައިރެކްޓަރުން ކަމަށްވާ ރާޖް އެންޑް ޑީކޭއާ އެކީގަ އެވެ.
ވަރޫން އާއި ނަތާޝާ ކައިވެނިކުރީ 2021 ގަ އެވެ.
ވަރޫން އަކީ ބޮލީވުޑްގެ މަޝްހޫރު ޑައިރެކްޓަރު ޑޭވިޑް ދަވަންގެ ދެ ކުދިންގެ ތެރެއިން ހަގު ދަރިފުޅެވެ. ވަރޫންގެ ބޭބެ ޑައިރެކްޓަރު ރޯހިތު ދަވަންގެ ދެ ކުދިން ތިބެ އެވެ.
ބޮލީވުޑްގެ މިހާރުގެ އެންމެ ކާމިޔާބު އެކްޓަރުންގެ ތެރޭގައި ހިމެނޭ ވަރޫންގެ ފަސް ޕްރޮޖެކްޓެއް ކުރިއަށް އެބައޮތެވެ. އެއީ "ސިޓަޑެލް: ހަނީ ބަނީ" ގެ އިތުރުން ޑިސެމްބަރު 25 ގައި ސިނަމާތަކަށް ގެންނަ "ބޭބީ ޖޯން" އާއި އިތުރުން ޝޫޓިން ކުރިއަށްދާ ބައްޕަގެ ފިލްމު "ހޭ ޖަވާނީ ތޯ އިޝްގް ހޯނާ ހޭ" އާއި ޑައިރެކްޓަރު ޝިޝާންކް ކައިތާންގެ "ސަނީ ސަންސްކާރީ ކީ ތުލްސީ ކުމާރީ" ގެ އިތުރުން އަންނަ މަހު ޝޫޓިން ފަށަން ހަމަޖެހިފައިވާ "ބޯޑާ 2" އެވެ.
ވަރޫން ބޮލީވުޑަށް ނުކުތީ 2012 ގެ "ސްޓޫޑެންޓް އޮފް ދި އިޔާ" އިންނެވެ.