އަތޮޅުތަކުގައި ފުލުހުންގެ ހިދުމަތް މިހާރަށް ވުރެ ރަނގަޅަށް، ހަރުދަނާކޮށް ދިނުމަށްޓަކައި ފުލުހުން މަސައްކަތްކުރާނެ ރަނގަޅު އޮނިގަނޑެއް އެކުލަވާލުގެ މަސައްކަތް ކުރަމުން އަންނަ ކަމަށް ޕޮލިސް ކޮމިޝަނަރު އަލީ ޝުޖާއު ވިދާޅުވެއްޖެ އެވެ.
ހއ. ވަށަފަރު ޕޮލިސް ޕޯސްޓް ހުޅުވަން ބޭއްވި ރަސްމިއްޔާތުގައި ސީޕީ ވިދާޅުވީ ކައުންސިލްތަކާއި މުއައްސަސާތަކާ ގުޅިގެން އެކީގައި ދެމެހެއްޓެނިވި ގޮތުގައި ހަރުދަނާކުރުމަށް އޮނިގަނޑު މަގުފަހިކުރާނެ ކަމަށެވެ. އޭނަ ވިދާޅުވީ ރައްޔިތުންނަށް ފޯރުކޮށް ދެމުން އަންނަ ޚިދުމަތް ރަނގަޅުކޮށް ފުލުހުންގެ ޚިދުމަތް ކުރިއެރުވުމަށް ބޭނުންވާ ބަދަލުތައް މިހާރު ވެސް ގެންނަމުން އަންނަ ކަމަށެވެ.
"ފުލުހުން ތިބުމުން އިޖުތިމާއީ އަދި އިގުތިސާދީ ތަރައްގީއަށް މިރަށުގެ ރައްޔިތުން ކުރަމުންދާ މަސައްކަތްތަކަށް އިތުރު އެހީތެރިކަމެއް ލިބިގެންދާކަމީ އެއްވެސް ޝައްކެއް އޮތްކަމެއް ނޫން." ސީޕީ ވިދާޅުވި އެވެ.
އޭނަ ވަނީ ރަށްރަށުގައި ގާއިމުވެތިބޭ ފުލުހުންނަކީ ހަމައެކަނި ބޮޑު ކަމެއް ދިމާވުމުން އެތަނަށް ހާޒިރުވާން ތިބޭ ފުލުހުންނަށް ނުވުމަށާއި، ރަސްމީ ޑިއުޓީ ގަޑީގައި ވީހާ ވެސް ބޮޑަށް ރަށުތެރޭގައި ހަރަކާތްތެރިވެ ރައްޔިތުންނާ ގާތުން މަސައްކަތް ކުރުމަށް އިލްތިމާސް ވެސް ކުރައްވައިފަ އެވެ.
މުޅި ރާއްޖެ އަށް ފުލުހުންގެ ހިދުމަތް ފުޅާކުރަން ކުރަމުން އަންނަ މަސައްކަތުގެ ތެރެއިން މިހާތަނަށް ވަރަށް ގިނަ ރަށްރަށުގައި ޕޮލިސް ސްޓޭޝަންތަކާއި ޕޮލިސް ޕޯސްޓްތައް ގާއިމުކޮށްފައިވެ އެވެ. އެގޮތުން މި ސަރުކާރު އައި ފަހުން ވެސް 70 އަށް ވުރެ ޕޮލިސް ޕޯސްޓް ހުޅުވާފައިވެ އެވެ.