މީހުން އުމްރާ އަށް ގެންދާ ރާއްޖޭގެ ކުންފުނިތަކުން އަގުހެޔޮ ޕެކޭޖްތަކެއް ތައާރަފުކޮށް ދެއްވުމަށް އިސްލާމިކް މިނިސްޓަރު ޑރ. މުހައްމަދު ޝަހީމް އަލީ ސައީދު އެދިވަޑައިގެންފި އެވެ.
މިއަދު އިސްލާމީ މަރުކަޒުގައި ފެށި ރާއްޖޭގެ ފުރަތަމަ "ހައްޖު، އުމްރާ ކޮންފަރެންސް" ގައި މިނިސްޓަރު ވިދާޅުވީ އަގުހެޔޮ ޕެކޭޖްތަކެއް ތައާރަފު ކުރަން ޖެހެނީ ވީހާ ވެސް ގިނަ ބަޔަކަށް އުމްރާ އަށް ދިއުމުގެ ފުރުސަތު ފަހިކޮށް ދިނުމުގެ ގޮތުންނާއި އަހަރުގެ ހުރިހާ ދުވަސްވަރެއްގައި ވެސް މީހުން އުމްރާ އަށް ގެންދަން މަގުފަހި ކުރުމަށްޓަކައި ކަމަށެވެ.
މިނިސްތަރު ވިދާޅުވީ 20،000-15،000ރ. ގެ ޕެކޭޖްތަކެއް ތަޢާރަފުކޮށްފި ނަމަ އުމްރާ އަށް ގިނަ ބަޔަކަށް ދާން މަގުފަހިވާނެ ކަމަށެވެ. އެހެންވެ އެކަމަށް ރިއާޔަތްކޮށް އަގުހެޔޮ ޢުމްރާ ޕެކޭޖްތަކެއް ތަޢާރަފުކޮށް ދެއްވުމަށް އެދިވަޑައިގެންނެވި އެވެ.
"މިހާރު މި އޮންނަނީ ރޯދަ ޢުމްރާ، ޖެނުއަރީ، ފެބްރުއަރީ ޢުމްރާ ގޮތަށް. މި އުސޫލަށް ނިޒާމީ ބަދަލެއް ގެންނަން އެބަޖެހޭ. އެއީ އަބަދުވެސް ޢުމްރާއަށް ދެވޭނެ ގޮތެއް އޮތުން،" ޝަހީމު ވިދާޅުވި އެވެ. "ކޮންމެ އިރެއްގައި ވެސް ޢުމްރާއަށް ދެވޭނެ ގޮތެއް އޮތުން. ކޮންމެ ދުވަހެއްގައި ވެސް އެ މީހަކަށް ފަސޭހަ ދުވަހެއްގައި ދެވޭނެ މަގުކޮށާފައި ބޭއްވުން. އަދި ޒުވާނުންނާއި ދަރިވަރުންނާއި ބެލެނިވެރިންނަށް އެކިއެކި ފަރާތްތަކަށް އަގުހެޔޮ ޕެކޭޖުތައް ތަޢާރަފު ކުރުން."
މިނިސްޓަރު މިއަދު ވަނީ ޢުމްރާއަށް ގެންދާ ކުންފުނިތަކުގެ ތެރެއިން އެންމެ ރަނގަޅު 5 ކުންފުންޏަކަށް އަންނަ އަހަރުން ފެށިގެން ސްޓާ ދޭން ފަށްޓަވާނެ ކަމަށް ވެސް ވިދާޅުވެފަ އެވެ.