"ދާލަން" ގެ ނަމުގައި އަންނަ މަހު އެކްސްޕޯއެއް ބާއްވަން ތައްޔާރުވާން ފަށައިފި އެވެ.
އަންނަ މަހުގެ 15 އާއި 16 އަށް ހުޅުމާލޭގެ ސެންޓްރަލް ޕާކްގައި ބާއްވާ މި އެކްސްޕޯ އަކީ ހަޔަ އެޑިއުޝަން މިނިސްޓްރީން އިން އިންތިޒާމުކޮށްގެން ބާއްވާ ސްކިލްސް އެންޑް ކެރިއާ އެކްސްޕޯއެކެވެ.
މި އެކްސްޕޯ އަކީ ޒުވާނުންނަށް ހުރި ވަޒީފާގެ ފުރުސަތުތަކާއި، ވަޒިފާއަކަށް ތައްޔާރުކޮށް ދިނުމަށް އަމާޒުކޮށްގެން ބޭއްވޭ ހަރަކާތެކެވެ. އެކްސްޕޯގައި ކޮލެޖުތަކާއި، އިންސްޓިޓިއުޓްތަކާއި، ސަރުކާރުގެ ހިއްސާވާ ކުންފުނިތަކާއި، އިންޑަސްޓްރީގެ ބައިވެރިންނާއި އަދި އެކި މިނިސްޓްރީތަކުގެ ޑިޕާޓްމަންޓްތަކުން 45 އަށް ވުރެ ގިނަ ސްޓޯލް ހުންނާނެ އެވެ.
މިއީ ދަރިވަރުންނާއި ޒުވާން ޕްރޮފެޝަނަލުންނަށް އިންޓަރެކްޓިވް ސެޝަންތަކާއި، މަޢުލޫމާތު ފެތުރުމާއި، ލައިވް ޑެމޮންސްޓްރޭޝަންތަކާއި އަދި ޝައުޤުވެރިކަން ހުރި ހަރަކާތްތަކުގެ ތެރެއިން އެކި ވައްތަރުގެ ވަޒީފާގެ މަގުތައް ދެނެގަތުމަށް ލިބޭ ފުރުޞަތެކެވެ.
މި އެކްސްޕޯގައި އެކި ދާއިރާތަކުން ފާހަގަކޮށްލެވޭ ބޭފުޅުންގެ މަޝްވަރާ ބައްދަލުވުންތައް ކުރިއަށް ގެންދަވާނެއެވެ. އަދި މި ބައްދަލުވުންތަކުގައި ވަޒީފާގެ ދާއިރާގައި ކުރިއަށްދިއުމަށް ބޭނުންވާ އަގުހުރި މަޢުލޫމާތު ދެއްވާނެއެވެ. އަދި ބައިވެރިންނަށް ވަޒީފާގެ ފުރުޞަތުތަކާއި އެ ފުރުޞަތުތަކަށް ވާޞިލުވުމަށް ބޭނުންވާ ރަނގަޅު މަގުތަކާ ބެހޭ ސާފު މަޢުލޫމާތު ލިބިވަޑައިގަންނަވާނެއެވެ.
މިނިސްޓްރީން ބުނީ މި އެކްސްޕޯއަކީ މަތީ ތަޢުލީމުގެ ފުރުޞަތުތައް ދައްކުވައިދޭ އިވެންޓެއް ނޫން ކަމަށެވެ.
އެކްސްޕޯ އަށް ޒިޔާރަތްކުރާ ޒުވާނުންނަށްފަންނީ އަދި ޓެކްނިކަލް ތަމްރީނު (ޓީވެޓް) ގެ ދާއިރާގެ މާހިރުންނާ ބައްދަލުކު ރެވޭނެ އިންތިޒާމްތަކާއި، މަތީ ފަންތީގެ ފަތުރުވެރިކަމާއި، އިމާރާތްކުރުމާއި، ދެމެހެއްޓެނިވި ތަރައްޤީއާއި، އިންޖިނިއަރިން ފަދަ މުހިންމު ދާއިރާތަކުގެ ވަޒީފާގެ ފުރުޞަތުތަކާ ބެހޭ މަޢުލޫމާތު ދެވޭނެ އެވެ. އޭގެ އިތުރުން އަމިއްލަ އިންސްޓިޓިއުޓްތަކާއި ޓީވެޓް ސެންޓަރުތަކުން ވެސް މައުލޫމާތާއި ހުރި ފުރުސަތުތައް އިތުރަށް ހާމަކޮށްދޭ ނެއެވެ.
އެގޮތުން އެކި ފަރާތްތަކުން ލިބެންހުރި ކޯސްތަކާއި، އިތުރަށް ކިޔެވުމުގެ ފުރުޞަތުތަކާއި، ވަޒީފާގެ ފުރުޞަތުތަކާ ބެހޭ މުހިންމު މަޢުލޫމާތު ވެސް "ދާލަން" އެކްސްޕޯ އިން ލިބިގެން ދާނެ އެވެ.