އިލެކްޓްރިކް ވެހިކަލް (އީވީ) އުފައްދާ ޗައިނާގެ މަޝްހޫރު ކުންފުނ،ީ ބީވައިޑީން މި އަހަރުގެ ތިން ވަނަ ކުއާޓަރުގެ އާމްދަނީއާ އެކީ ޓެސްލާ ކުންފުނި ފަހަތަށް ވައްޓާލައިފި އެވެ.
މިއީ އެ ކުންފުނިން ޓެސްލާގެ އާމްދަނީ އަށް ވުރެ ބޮޑު އާމްދަނީއެއް ހޯދި ފުރަތަމަ ފަހަރެވެ. މީގެ އިތުރުން ބީވައިޑީން ވަނީ މިދިޔަ މަހު އެކަނި ވެސް ރެކޯޑް އާމްދަނީއެއް ހޯދައިފަ އެވެ.
އީވީގެ ވިޔަފާރީން މިހާރު ބޮޑު ކުރިއެރުމެއް ހޯދަމުން އަންނަ ބީވައިޑީ އަށް ވަނީ ޖުލައި މަހުން މިދިޔަ މަހަށް އާމްދަނީގެ ގޮތުގައި 200 ބިލިއަން ޔުއާން (28.2 ބިލިއަން ޑޮލަރު) ހޯދައިފަ އެވެ. މިއީ މިދިޔަ އަހަރުގެ އެ މުއްދަތުގައި އެ ކުންފުންޏަށް ލިބުނު އާމްދަނީ އަށް ވުރެ 24 ޕަސެންޓްގެ ކުރިއެރުމެކެވެ.
އީވީގެ ވިޔަފާރީގައި ދުނިޔޭގައި ރަސްކަން ކުރަމުން އަންނަ މަހުޖަނު އީލޮން މަސްކްގެ ޓެސްލާ އަށް މި އަހަރުގެ ތިން ވަނަ ކުއާޓަރުގައި ލިބިފައި ވަނީ 25.2 ބިލިއަން ޑޮލަރެވެ. ބީވައިޑީގެ ތިން ވަނަ ކުއާޓަރުގެ އާމްދަނީ ޓެސްލާ އަށް ވުރެ ބޮޑު ނަމަވެސް އެ ކުއާޓަރުގައި ޓެސްލާ އިން ވިއްކި ކާރުގެ އަދަދު ގިނަ އެވެ.
ޗައިނާގައި އީވީ އަށް އޮންނަ ޑިމާންޑް އެއް ދުވަހުން އަނެއް ދުވަހަށް އިތުރުވަމުން އަންނަ އިރު، ބައިޑްގެ އީވީތަކަށް އޮންނަ ޑިމާންޑް އަންނަނީ އެއް ދުވަހުން އަނެއް ދުވަހަށް އުފުލެމުންނެވެ. މިހާތަނަށް ޓެސްލާ އަކީ އެ ވިޔަރާގައި އެންމެ ކުރީގައި ޗައިނާގައި ދަމަހައްޓަމުން އައި ކުންފުންޏެވެ.
ބައިޑްގެ މަގުބޫލުކަން ބޮޑުވަމުން އަންނަ އިރު، އީވީ ފަދަ އުފެއްދުންތައް ނެރޭ ކުންފުނިތަކަށް ޗައިނާ ސަރުކާރުން މާލީ އެހީތެރިކަން ފޯރުކޮށްދޭތީ އެކަމަށް ފާޑުކިޔުންތައް އަމާޒުވެފައިވެ އެވެ. އަނެއްކޮޅުން ޗައިނާގެ މިފަދަ އުފެއްދުންތަކަށް އީޔޫ އާއި އެމެރިކާ ދަނީ ފިއްތުންތައް ކުރިމަތި ކުރަމުންނެވެ.
އެގޮތުން އީޔޫ އިން ވަނީ މި ހަފުތާގެ ތެރޭގައި ޗައިނާ އިން އެތެރެކުރާ އީވީތަކަށް ނަގާ ޓެރިފް 45.3 ޕަސެންޓަށް ބޮޑުކޮށްފަ އެވެ. އަދި އެމެރިކާ އިން ކެނެޑާ އިން މިހާރު ވެސް އޮތީ ޗައިނާގެ އީވީތަކުން ނަގާ ޓެކްސް 100 ޕަސެންޓަށް ބޮޑުކޮށްފަ އެވެ.